Shillong, Naitung 19: Ka Ieng Rasong Sports Social And Cultural Club,
ha ka jingpyllait khubor jong u Bah S Lyngdoh, publicity secretary
jong ka, u la ong ba ka seng ka la pynlong ia ka general council
meeting ha ka 17 tarik Naitung, 2014, ha Shillong Club Residential
Quarter, Shillong.
Ha katei ka sngi, ka jingialang ka la pyrkhat bad
pyndep shibun ki kam kiba kyrkieh eh jong ka council na ka bynta ban
pynkhreh shaid shaid ia kiwei ki prokram jong ka nangne shakhmat.
Ka Ieng Rasong SS&CC ka la shim kabu ruh ha katei ka
sngi ban rakhe ruh ia ka lyngkhuh sngi iap ba 179 snem jong u
Khlawait ka Ri, u Syiem Tirot Sing, ka Hima Nongkhlaw, ha kaba u Bah
Ban Basaiawmoit, MDC uba dei ruh u EM ka KHADC, Shillong, u la long u
Kongsan.
Kum u Kongsan, u Bah Ban Basaiawmoit u la ong ba kane
ka pateng kaba mynta bad kaba mynshuwa la iohi bad mad ia kane ka
pateng mynta kaba la tyrkhong ha baroh ki liang, naduh ka burom ka
akor, ka jingnang jingstad, ka khaïi pateng, ka synshar khadar bad u
la ong ruh ba kum ka jaidbynriew kaba dap da ka jingbym ia tylli bad
ka jingbishni ba kine baroh donkam ban don noh ia ka jingkylla.
U la kyntu ruh ia ki nongialam ka Seng ba kin long
borabor ki nongbud ia ki nuksa ba bha tam jong u Syiem Tirot Sing, uba
la long uwei na ki Khlawait ka Ri bad ka Jaidbynriew, uba la len lade
na ka bynta ban pyllait mraw ia la ka ri na ka jingshah thombor ha ka
jingsynshar nongwei.
Hadien kane ka jingialang, ka seng baroh kawei ka la
pynlong ruh ia ka jingleit buh syntiew ha u mot jong utei u Khlawait
ka Ri Khasi, kaba don ha State Central Library, Shillong bad la ioh
ruh ia ka jingkren ai khublei na u Bah D Nongbri, general secretary
katei ka seng.(SP News)
