Shillong, Nohprah 21: Mynta ka sngi u bah Teinwell Dkhar MDC jong ka Shella u la buh ia ka jingkylli hapoh ka iing dorbar thawain ka KHADC ba balei slem ki nongtrei ka KHDAC ki ioh tulop slem bad kiei ki lat ki lynti la shim ban pynpoi ia ka tulop ha kapor kaba biang namar ia ka tulop la siew palat ia ka shiphew tarik jan man u bnai.
Halor katei ka jingkylli na ka liang jong u Chief Executive Member u bah Pyniaid Sing Syiem la jubab ba ka tulop jong ki nongtrei la juh siew ha ka por ba biang, ha ka juh ka por u la kubor ba kala don ar bnai ei ei ba ka jingsiew kala tam ia ka 10 tarik jong u bnai.
Kane ka jingslem ha kitei ki ar bnai ka long ba ka poi slem ka pisa ba dei ka musur kaba ka dei ban ioh na ka sorkar bad ia kane ka bhah dang ioh shen ha kine kikhyndiat sngi, ka daw ka long ba ia ka pisa ba dei bad ki kam pynroi ym lah ban pyndonkam ban siew ia ka tulop.
La iathuh hapoh ka iing dorbar ba ka jingsiew ia ka tulop naduh k nongtrei bad ia ki dkhot ka iing dorbar bad ia ki ba don ha ka Executive Committee mynta kala jan kot sha ka san klur ha ka shibnai, ka EC kala shim bun ki lat ki lynti ban peit ba ia ka tulop ban siew ha ka por ba biang.
U Bah Teiborlang Pathaw EM ba dei peit ia ki iing ki sem jong ka KHADC haba jubab ia ka jingkylli jong u bah Jambor War la ong ba ka ophis ka dang pyrkhat ba kumno ban buh ia ka shnat trei kam jong ka KHADC ha Eastern West Khasi Hills District.
U bah Pynshngain N Syiem haba jubab ia ka jingkylli u bah Jambor War ha kaba ia dei bad ki Bill kiba dang sah bad ki bym pat ioh ia ka jingmynjur na U Lat kiba dei jong u snem 2019 haduh 2023, la pyntip hapoh ka iing dorbar ba ki dang sah baroh kid on 8 tylli.
Haba jubab ia ka jingkylli bynrap ha kaba ia ei bad ka Khasi Inheritance Bill kaba la wan phai bad don ha ka Select Committee, la ong ba ynsa wanrah hapoh ka iing dorbar khnang ban ioh ban thaw biang ia ka Select Committee ban peit bniah ia kane ka bill.
