Shillong, Jylliew 04: Ka KSU NKHD Unit lyngba kane ka kyrwoh ka ai ka jingkitbok kitwriang ia ki paidbah ka them Ri Bhoi jong ia kiba la nohsynniang bad la aiti met bad mynsiem ban rah ia ka nam ka burom jong ka Them Ri Bhoi ha ki liang ba pher ba pher, Khamtam ia ki Riewrangbah, ki riewpawkhmat kiba la trei shitom la ka buit ka bor kumno ban pynioh ia ka Ri Bhoi District haduh ba kan urlong ha ka 4 tarik u Jylliew 1992.
Ka KSU NKHD Unit ka kyrmen skhem ba ka Ri -Bhoi District kan nangiai kiew rasong ha baroh ki liang lyngba ka jingtrei shitom ki paidbah nongshong shnong jong ka, U synniang u bynhei na baroh ki liang ka long kaba donkam la ka dei na ki riewrangbah,ki longkmie, ki samla pule naka bynta ka jingmyntoi jong ka Ri Bhoi District hi baroh kawei.
Ka KSU ka kyrmen skhem ki paidbah nongshong shnong ka Ri Bhoi District kin iai kiew shaphrang ha ki kam ialehkai, ka pule ka puthi, ka trei ka ktah la ka dei ha kano ka bynta, ka seng ka ai ka jingkyntu ruh sha ki samla pule ba kin nang iai minot khnang ba kin ioh ban kynjoh ha ki kyrdan ba pher ba pher ha ka jingpule ne kano kano kam jong ki khnang ba kin long ki nongmuna pat sha ki pateng ki ban sa wan.
Ka KSU NKHD Unit ka ai khublei ruh sha baroh ki paidbah nongshong shnong ka them Ri-Bhoi jong i kiba don ha ki kam lajong ne ha ki ophis sorkar kin nang iai treibha trei miat na bynta ka roi ka par bad kin long ruh ka nuksa ba bha ia kiwei pat ki nongshong shnong.
Ha ki 31 tylli ki snem ka Ri Bhoi District ka la sei shibun ki riewpawkhmat ha ka jylla ha ki kam bapher bapher kiba la shakri ia ka jylla hi baroh ka wei, Kumjuh ki samla kiba la mihkhmat ia ka jylla ha ki kam bapher bapher.
Ai ba ka jingdap 31 snem ka Ri Bhoi District kan nang lah ban sei ki khraw pyrkhat, Ki khraw jabieng ki ban nang lah ban pyrkhat ban pynwandur khambha shuh shuh ia ka Ri Bhoi District jong i bad ia ka jylla Meghalaya.
Kum ban shu kyrtiang dien Mynshwa ka them Ri Bhoi ka dei tang ka Ri-Bhoi Sub-Division jong ka East Khasi Hills District ka Jingkiew jinghiar ka Ri-Bhoi District ka shong ha ki jingmut jingpyrkhat bad ha jingtrei shitom jong ki paidbah nongshong shnong,
Ka seng ka kyrmen skhem ba u synniang u bynhei jong ki paidbah ka them Ri-Bhoi baieid kan long ka bha bad kaba seisoh ha baroh ki liang, kane ka long katkum ka kyrwoh kaba la phah da u Samla James Mawphniang General Secretary KSU NKHD Unit.
