Shillong Nohprah 20: u bah Martle N Mukhim MDC ka Mawkynrew konstiwensi EM ba dei peit ia ka tnad pynroi hapoh ka Khasi Hills Autonomous District Council (KHADC) u la takrain ia ka sorkar ba la ialam da ka National Peoples’ Party (NPP) namar ba ka shu kwah ban bam lut ia ka bhah kaba dei bad mang na bynta ki Autonomous District Council ha kane ka jylla.
Haba kren halor ka bhah ba la mang da ka sorkar India sha ki ADC ha kane ka jylla, u bah Martle u la ong ba kane ka sorkar MDA kadei ka sorkar khynnah namar ba ka kwah ban bam hi lut bad kam tip eiei ia kaba lieh ne kaba iong ruh bad ki la shu ialeh hi khlem da tip.
U bah Martle ba dei ruh u kyrtong ka party HSPDP la ong ba watla ka sorkar India ka la thoh shai kdar ba la mang na bynta ka District Council ia ka pisa T.40 klur hynrei kane ka sorkar kaba ialam ka NPP, ka la rai ban pyntrei hi, ia kane la kren ha kaba plie iaka kam pynroi ha shnong Thynroit hapoh ka skul Presbyterian, ka painkhana.
U bah Martle u la ong ba kane ka jingleh ka sorkar, ka la pynbitar jur ia u haduh ba u la pan bor na ka Executive Committee ba un shim ban rah hi ia kane ka mat ban iakren bad ka sorkar jylla.
La iathuh haba u leit iakynduh ia u Myntri Rangbah u Conrad K Sangma, u la ong ym donkam shuh ban iakren ia kane, lada ka long un shu pule, ong ba ka long, lada kam long, ong kein noh.
U Conrad u mynjur khlem da iasyllok shuh bad ki para Myntri kiba don lang ha ka sorkar bad u la shu thoh beit, sngewbha pyllait noh ia ka pisa kaba la mang ia ki Autonomous District Council mardor, la ong u bah Martle.
U bah Martle u la maham ba ym ju dei ban khohreh kumba leh kane ka sorkar, kaba ong ban pynkhlain ia ka District Council hynrei ki iakhun ban pynjot ia ka District Council namar ba ki pyrkhat tang ia ka met lajong ba lada ai ia ka skhim sha District Council, kin khlain ki MDC bad ki klet noh ia ka jingtlot ka District Council.
