Shillong, Rymphang 28: U nongai ktien jong ka All India Congress Committee(AICC) u Mathew Anthony u ba long ruh u Media coordinator jong ka North east mynta ka sngi u la kynnoh ba ka sorkar ba la ialam da u Narendra Modi ka dei ka ba shyrkhei bha ha ka bamsap.
U tei u nongialam jong ka AICC u la kynnoh ba ka don ruh ka jingleh bymhok bad ka ba leh bymhok ia ki paidbah la kalong ha ka ioh ka kot, ka imlang ka sahlang, ka synshar ka khadar bad ka jingbym ioh kam ioh jam jong ki paidbah.
Ha ka jingiakren bad ki lad pathai khubor ha nongbah Shillong u Mathew Anthony u la takrain ruh halor ka jingkiew dor jong ki marbam mardih, ka jingle bymhok ia ki Scheduled caste bad ki Scheduled Tribe bad ia kiewi pat mi jaidbynriew ki ba dang sah dien. U la ong ruh ba ka jingshah leh beijot jong ki kynthei ki jia manla ka sngi.
U Mathew Anthony u la ong ruh ba ha kine ki shiphew snem jong ka jingsynshar ka sorkar u Modi ha ka snem 2015 u la kular ban peit bniah halor ka jingkiew dor ki mar kimat, ka jingshong shngain ki kynthei, ka jingaikam ai jam ia ki samla bad kiwi kiwei hynrei kine baroh kim shym la urlong.
U la ong ruh ba ha ka por jong ka jingsynshar ka sorkar Congress ka la lah ban ai kam ia ki samla kumba 75 lakh manla u snem hynrei ka sorkar jong u Modi kam lah wat tangban ai kami a ki samla.
U la ong ruh ba kane ka sorkar jong ka BJP ka la leh kai bad ka jingkiew dor jong ki marbam mardih bad kumjuh ka petrol, disel bad ka LPG gas ha kaba kane ka la ktah bha ia ki riewpaidbah.
U Mathew u la ong ruh ba ha ka ba iadei bad ka jingeh ba ki nongrep ki ia kynduh haduh mynta palat 700 ngut ki nongrep ha poh ka Ri ki la pyniap ia lade ha kne ka jingsynshar ka sorkar BJP ha ka ba ka la wanrah ia ki Ain ki ba ktah ia ki nongrep.
U la ongruh ba kane ka sorkar BJP ka la pyndonkam bakla ruh ia ka bor ha kaba ka la tuklar ia ka Iingbishar, ka Election Commission, ka CBI bad kiwei kiwei pat ki tnad trei kam jong ka sorkar pdeng.
U la ong ruh ba kane ka la dei ka por na ka bynta ki paibah jong ka Jylla Meghalaya bad ka Ri ba kin ailad biang ia ka Congress ba kan wan ha ka bor khnang ba ka jingsuk bad ka roi ka par kan wan phai biang ha ka Ri.
