Shillong, Iaiong 28:Ka shnong Patharkhmah bad ka thain Ri Bhoi sepngi ka la mad ia ka jingdum ha kine ki sang ba ladep na daw ka jingbym shimkhia ki nongtrei jong ka MeECL ban pynbiang bording kaba la ktah ia ki paidbah khamtam kito pyndonkam ia ka bording na bynta ban pyndep ia ki kam ki jam kim don lad shuh da kumwei bad ki hab shu ieh.
“Ki paidbbah nalor ba ki hab ban siew ia ka bill light ki hab ban thied sa ka umphniang sharak ne mombati ban tbeh jingshai mynmiet ha ki iing ki sem jongki, kane ka ktah shibun ia ki longing baduk basuk ha ka thain ri Bhoi sepngi bad kumjuh ki khynnah skul kiba donkam ban pule kot,” la ong u Bah Najim Kharmalki, Vice Chairman ka Western Ri Bhoi Development Council.
Utei u rangbah ula pynpaw ia ka jingbym sngewtynnad ia ka rukom treikam ka MeECL kaba la shim noh ban pyntrei ia kam sam bording ha ka Jylla na ka MeSEB da kaba ong, “Ki nongtrei ka MeECL kim ju wan peit ia ki meter la kito ki trai iing kiba ring light ki ioh ne ki duh baroh shibnai katba ka bill pat ki phah beit na ophis ban lum ia ki nongtrei ha ki iing baroh, kane ka dei ka jinglute barieh ka MeECL ia ki paidbah nongkyndong baduk wat lada kim ioh linght da ki taiew ruh ki hab ban siew beit ia ka bill ba la phah da ka ophis.”
U Bah Najim ula ban jur ba ka eECL ka dei ban pynbiang ia ki nongtrei ha katei ka thain kynthup ia ki linemen bad nongpynkhuid ia ki sainar light bad kim dei ban ai daw ba ym don briew ne ym kali haba leit pyntip ha ophis. ula bynrap ba bun sien haba leit pyntip ka jubab na katei ka ophis ka sei ba ym don briew ne kali ban leit peit ia ki jaka ba la suba ba don ka jingthut jong ki sainar light.
Ula pynpaw ba ki paidbah katei ka thain shen ki pynlong ia ka jingialang halor ka jingbymlah ka MeECL ban pynbiang ia ka bording wat hadien ba la pyntip bun bun sien hynrei ka iai long kumjuh khlem sei soh.(SP News)
