Nongpoh, Risaw 11: Ha ka sienjam ban ai jingtip shaphang ka jingdonkam jong ka jingkhuid bad ka jingioh ia ka bam kaba tei ha Ri Bhoi District, ka Central Bureau of Communication, hapoh ka tnat Information and Broadcasting, Sorkar India mynta ka sngi ka la pynlong ia ka exhibition bad ka prokram ai jingtip.
Kane ka sienjam kaba tip kum ka “Swachh Bharat and PoshanAbhiyan,” ka thmu ban pyni ia ka jingdonkam ia ka mariang kaba khuid bad ka jingioh ia ka bam kaba tei na ka bynta ka koit ka khiah bad ka bha ka miat jong ki briew.
Kane ka prokram kaba lai sngi ka dei kaba la pynlong ha Alpha English Higher Secondary School ha Nongpoh bad la plié ia ka da u Manish Kumar, IAS uba long u Assistant Commissioner ka Ri Bhoi.
Ki khynnah skul bad ki ophisarna ki tnat bapher bapher ha Ri Bhoi ki la iashim bynta ha kane ka prokram. La iadonlang ruh ka Jane Namchu, Additional Director General jong ka Zonal Central Bureau of Communication ha Guwahati kum ka kongsan.
Kito kiba la iadon lang ha kane ka sngi ki long u Gopajit Das, Head Office jong ka Central Bureau of Communication, Shillong, Bah BiangbokBasaiawmoit, u nongmihkhmat na ka C&RD Block Umling, ka Kong D. Shylla, ka Nutritionist na ka ophis DPO, W.K Blah, Principal kaAlpha English Higher Secondary School, Nongpoh bad kiwei kiwei.
Kane ka sienjam jong ka Central Bureau of Communication, Sorkar India ka ban jur halor ka jingdonkam ia ka jingkhuid bad ka jingioh ia ka bam kaba tei ban pynthikna ia ka koit ka khiah bad ka jingriewspah ia baroh.
Kane ka prokram kan don ka jingktah kaba jur ia ka imlang sahlang bad ka dei ka dak jong ka jingkut jingmut ka Sorkar ban tei ia ka India kaba kham khuid bad kaba kham shngain ha ka koit ka khiah.
Ha kajuh ka por, ka Central Bureau of Communication hapoh ka tnat Information and Broadcasting, Sorkar India, ka la pynkup burom ruh ia u nonghikai ka Alpha English Higher Secondary School, u Madhav Singh uba la ioh ia ka khusnam National Teachers’ Award mynta u snem na ka President jong ka India, ka DroupadiMurmu ha New Delhi dang shen.
Ha kane ka prokram kaba lai sngi, kin don ki prokram bapher bapher kum ka jingpyni ia ki dur shaphang ki nongiakhih na ka bynta ka jinglaitluid kiba dei na ka thain shateilammihngi, ki jingpynkhuid, ka jingiaid paidbah, ka jingiakhun Quiz & Science Exhibition hapdeng ki skul, ka jingiakopdrojingdro bad ki jingiashad bad ruh ka jingthungdieng.
