Khliehriat, Rymphang 08: Ka AJYWO Central Body mynne ka sngi hapoh ka jingialam u Bah M.H Dkhar, President jong ka bad u Bah WS Suting President jong ka AJYWO East Jaintia Zone, ha ryngkhat ka dorkhast ki la leit ia kynduh ia u Deputy Commissioner jong ka East Jaintia Hills District, bad ruh ia u Block Development Officer jong ka Wapung C & RD Block ia kaba la tip mynshuwa kum ka Khliehriat C & RD Block bad kyntu ia kitei ki arngut ki heh sorkar jong ka District ban pynsted noh ia ka jingpynkylla ia ka kyrteng jong ka Khliehriat C & RD Block: Khlehriat sha ka Wapung C & RD Block: Wapung kat kum ba la mynjur bad pynbna paidbah (Notified) da ka sorkar jylla naduh mynshem snem.
Ha ka dorkhast kaba ka AJYWO ka la ai ha u BDO jong ka tei ka C & RD Block, u Bah C.T Mawkon, ka seng ka la kyntu jur ia u ban pynsted noh ia ka jingpynkylla ia ka kyrteng bad ruh ia baroh ki jnit ki jnat ki ba iadei bad katei ka C & RD Block, sha ka Wapung C & RD Block: Wapung kat kum ba la pynbna da ka sorkar jylla khnang ba ki paidbah kin ym sah ha ka umdum halor katei ka C & RD Block khamtam eh ha ka jingiadei bad ki kam thoh kam tar kiba iadei bad katei ka C & RD Block namar ki don ha ka jingartatien mynta la kin thoh kum ba ju long ne da ka kyrteng thymmai kaba dang shuh dep pynbna shen da ka sorkar.
Kumjuh ruh ha katei ka juh ka sngi, ka AJYWO ka la leit ia kynduh ruh ia u Deputy Commissioner jong ka East Jaintia Hills District, u Bah M.S Lhuid, IAS halor ka juh ka phang ha ryngkat ka dorkhast bad ki jingiakren, ha kaba ka seng ka la kyntu jur bha ruh ia u tei u Khliehduh jong ka District ban leh ia kaba donkam ha ka jingiadei bad katei ka C & RD Block na ka bynta ka bit ka biang jong u paidbah jong ka Wapung C & RD Block: Wapung.
Kum ban shu pynkynmaw, ka sorkar jylla lyngba ka tnad C & RD Department jong ka, naduh mynshem snem ka la dep mynjur bad ruh pynbna paidbah syndon lyngba ka Notification No. CDD.129/2014/37, Dated, Shillong, the 18th November, 2016 ba la pynkynriah bad ruh pynkylla kyrteng ia ka Khliehriat C & RD Block sha ka Wapung C & RD Block hynrei haduh mynta, la jan dap 3 bnai katei ka ophis ka dang trei kam hi da ka juh ka kyrteng kaba la buh ia u paidbah ha ka umdum.
Ka seng ka kyntu jur ruh iaka sorkar jylla ba kan pynsted katba lah ei ia ka jingtei noh ia ka ophis trei kam jong katei ka C & RD Block lane ban wad shwa ia ki lad ki lynti ban pynkynriah kloi ia katei ka ophis sha katei ka thaiñ ba la pynkynriah thymmai ia ka mynta khnang ba yn ioh pyllait noh ia katei ka jaka bad ki jingtei ba la bat la baroh shi katta da katei ka C & RD Block barim khnang ba yn ioh pyndonkam na ka bynta ka tnad jong ka koit ka khiah ha katei ka district na ka bynta ka bit ka biang jong u paidbah jong katei ka C & RD Block.
Ha ka jingiakren bad kitei ki heh sorkar jong ka district ki ba dei peit ia katei ka bynta, ka seng ka pynpaw ia ka jingsngewnguh ia ki baroh arngut halor ka jingkloi jong ki ban shim khia bad ruh ban leh ia kaba donkam ha lor kane ka mat ba la wanrah da ka seng.
