Shillong, Lber 21: Ka nongialam ka seng JSU sengkmie mynta ka sngi ki lah shong iaka jingialang ba kyrkieh hapoh ka ophis treikam ka seng ha Jowai bad ki nongialam ka seng ki lah pynpaw iaka jingsngew khia kaba jur hadien ka jingbymlah ka sorkar bad ka tnat Jowai Municipal Board ban pynioh iaka jaka ban bret iaki nuit kiba lah lang lah bun taiew ha iew Jowai. Ki nongialam ka ki lah ong ba ka seng kam lah ban shu sngap jar bad peit kai haba ki thaiñ bad ki paitbah ki jingshem jingeh.
Kine ki nongialam ki lah ong ba ka JSU ka khot ka wer lang ia baroh ki paitbah jong ka ri lun Jaintia bad ka kyntu sha baroh ki para nongshong shnong ba hap hapoh ka West Jaintia Hills ban ia pyrkhat ban iatreilang bad ban ym don ka mynsiem jingsngew pher thaiñ ne shnong ban wanrah iaka khuid ka suba hapoh ka iew musiang.
Ka seng ka lah ong ba naduh ki snem ba lah dep ka lah ju ai jingmut sha ka sorkar bad iaka Jowai Municipal Board ba ka dei ban shimkhia iaka jaka ba lum bad bret iaki nuit ha Mynkjai bad ka seng ka lah ong ba kadei na ka jingkheiñ sting ka Municipal Board bad ka sorkar kan sa jia haduh une u pud ba long mynta ba ki paitbah bad ki nongshong iew ki shem jinjar ban ioh jaka pat ban bret iaki nuit.
U President ka seng u samla Jersom Shylla u lah ong ba ka sorkar kadei ban wad iaka jaka kaba biang paka ban bret iaka nuit da kaba pyndonkam iaka rukom thymmai ka Scientific waste management bad u lah ong ba ha shuwa ban leit bret iaki nuit sha kine ki jaka ka sorkar kadei ban ioh shuwa iaka jingpdiang na ki shnong ba marjan bad ki jaka ba lah jied kyrpang ban bret iaki nuit.
U General secretary ka seng u samla Treibor Suchen u lah ong ba ka jingsah ki nuit ha Jowai kadei ba kam don ka jingkit khlieh na ka Jowai Municipal Board bad baka sorkar naduh ki por ba lah leit bad kane ka wanrah iakane ka jingeh kaba khraw.
Na ka liang u ne u samla u lah ong iaka ba lah dep lah dep ngim lah shuh ban ia kren hynrei ngi dei ban pyrkhat thymmai ban ioh iaka jaka kaba bit ba biang ban wan rah biang iaka jingkhuid jingsuba ka Iaw Musiang sa shisien da ka jingiatreilang ki nongsynshar shnong ki paitbah bad ki nongmih khmat ka ri lum Jaintia.
