Shillong, Jymmang 20: Ka KSU South West Khasi Hills District haka kyrwoh shaki lad pathai khubor ka la dawa naka sorkar ban pynbiang noh kyrkieh iaka jingpynkhreh na bynta ka khlam COVID 19 bad ruh halor ki bynta ban kyntiew iaka koit ka khiah haka District .
Ka KSU jong ka South West Khasi Hills District la ong ba ka dstrict kumba long mynta ka don tang kumba 14 ngut ki doctors haki ar tylli ki CHC bad haki 3 tylli ki PHC ba don ha ka District kaba ha ka jingshisha ka jingdon briew mynta ka la lah ban kot shaka 1,20,000 ngut eiei.
Kane ka la buh jingeh iaki paitbah ka thain bad ka la pynkhia than iaki doctors kiba don hapoh ka District naba katba kum ka jingdon ki doktor bad ka jingdon ki briew katkum ka jingbthah ka World Health Organization ka long 1 doctor na bynta ki 1000 ngut ki nongshongshnong.
Haka Ri India ka long 1 : 1456 katba ka Ratio ha South West Khasi Hills District pat ka long tang uwei u doctor na bynta palat 8000 ngut ki nongpang.
Kane ka dei ka jingiuhroit iaka hok ki paitbah jongka District halor ka koit ka khiah khamtam haba iadei bad ka khlam COVID 19 kaba la pur sted bha ha kine ki por.
Kumta, ka seng ka kwah ban kyntu iaki bor sorkar ba ki dei ban sanction noh khamtam iaki post Doctors na bynta ka 100 bedded CHC kaba don ha Mawkyrwat namar kane ka CHC mynta ka don tang uwei u MD bad 3 ngut ki MBBS doctors.
Ka seng ka kyntu iaka sorkar ba ka dei ban pynbun iaki Ventilators bad ki Bilevel or two-level Positive Airway Pressure ( BiPAP) ha Mawkyrwat . Kumba long mynta , haka District la buh tang ar tylli ki Ventilators bad ar tylli ki BiPAP ha Mawkyrwat na bynta ki nongshongshnong jong ka District hi baroh kawei bad kane kum ka seng ngi sngew kan buh jingeh shikatdei lada kan don ka jingnang iai kiew ki positive patients khamtam kiba long serious ha kane ka jingpang haki sngi ban wan.
Katba kum ka jingleit jurip jongka seng , haka District ki don tang kumba 56 jingthiah eiei kata ka long 50 jingthiah ha Mawkyrwat bad 6 tylli ha Ranikor Civil Sub Division baroh kawei .
Kumta ka seng ka kyntu iaki bor sorkar ba ki dei ban mang nongtrei bad ruh ban pynkiew iaki jingthiah haki ar tylli ki Corona Care Centre ba don ha District khnang ba kan kham pynsuk haka jingpynkhreh halor ka khlam COVID 19.
Ka Seng ka sngew dei ruh ban dawa naka Sorkar ba ka dei ban pynpoi khambun ki Oxygen Cylinders hapoh ka District namar kumba long mynta watla ka jingdon briew ka bun hynrei ka jingdon ki Oxygen Cylinders haki CHC bad PHC ka dang long hapoh iaka 80 tylli eiei.
Kyntang iawai , ka seng ka ai iaka jingkitbok kitrwiang ia baroh ki nongtrei haka tnad ka koit ka khiah bad ruh kum ka seng ngi long kiba kloi ban ai ka jingiatreilang lem bad ki ha kane ka por haka jingiakhun iaka khlam COVID-19.
Ka KSU ka kyntu ruh iaki paitbah ba Kim dei ban tiengpud hynrei ban long pat kiba la pynkhreh da kaba ngin iarap lang paradoh parasnam khlem da don ka jingiapher shnong ne pher thain para mangi khnang ba ngin long kiba jop haka jingiakhun iaka khlam COVID 19.
Ka KSU ka kyntu ruh iaki MLA bad MDC jongka District ba Kim dei ban long tang ki nongpeitkai ha kaba kum kane ka por hynrei ngi sngew ba ka dei ka kamram jongki ban peit iaki jingdonkam ki paitbah bad ban pynbiang iaki jingduna kiba don haki PHC bad CHC, Kane ka long katkum ka kyrwoh bala phah da u samla Frwardman Nongrem President KSU South West Khasi Hills District.
