Shillong, Nohprah 15: Ka jingniew ia ki vote jong ki hynniew tylli ki MDC Constituency kaba ki paidbah kila dep ban jied ia ki MDC jong ki ha ka 13 tarik mynta u bnai ha ka election shiteng samoi kan long la shai ka sngi ba ki paidbah ki jied ia no na pdeng kiba bun ki kyrtong kiba la pan ia ka jingkyrshan na ki paidbah.
U Bah Taining Dkhar Secretary jong ka tand DC(A) u la ong ba ka jingniew vote kan sdang ha ka por phra baje mynstep ha ki saw tylli ki jaka, ha Shillong kan long ha JN Stadium na ka bynta ki lai tylli ki konstitwensi , ka Nongkrem, Laban –Mawprem bad ka Sohiong-Nongpsung Constituency.
Ha Mairang Civil Sub Division, ka jingniew vote kan long ia ki ar tylli ki constituency, ka Mairang-Nongkhlaw bad ia ka Pariong-Mawthadraishan katba ha Nongstoin kan long tang ia ka Rambrai-Jyrngam. Kine ki dei ki jaka niew vote na ka bynta jong ka KHADC.
Katba na ka bynta jong ka 1-War East kan long hapoh jong ka Amlarem Civil Sub Division, kane ka long tang kawei ka konstiwensi kaba hap hapoh jong ka JHADC. La ong ba leh se shuwa ka 11 baje mynstep la lah banpyndep ia ka jingniew vote ha baroh hynniew tylli ki constituency.
