Shillong, Nailur 28: U Myntri ba dei peit ia ka tnad pynneh pynsah ia ka riti dustur jong ka jylla Meghalaya u bah Sanbor Shullai mynta ka sngi u la ia kynduh ia u myntri korbar Ri u Ajay Bhatt ha kaba u la ia kren ia ka jingeh ki nongshimwai ki paidbah ia ki jaka jong Kantonment ha Shillong.
Ha kane ka jingiakynduh na ka liang jong u bah Sanbor u la kyrpad ia u myntri korbar Ri ban shim ia ka jingkhein jong ka STR da kaba khien 0.27 bad kane kan iarap ban kham pynduna ia ka baiwai na ka bynta kiba shimwai ia ki jaka jong ka Kantonment.
Ha kane ka jingiakynduh la kyntu ruh ia ku myntri ka sorkar pdeng ba ka tnad korbar Ri kan mang pisa ban shna ia ka Top Um ha Jhalupara, ban kyntiew kyrdan ia ka Goenka Hospital bad ia ka Shillong Cantonment School kumba la phah da ka Cantonment Board.
Ha kane ka jingiakynduh u bah Sanbor u la kyntu ia u myntri khynnah ba dei peit ia ka tnad iada Ri ba kane ka tnad ka sorkar pdeng ba kan ai ia ka jingbit ban shna ia ki surok hapoh jong kane ka nongbah Shillong khamtam ia ki jingeh jong ki paidbah ka shnong Mawshabuit namar ki rung ki mih na ka jaka jong ki shipai.
U bah Sanbor u la ong ba wat u MDC jong katei ka jaka u bah Pyniaid Sing Syiem u ba bat ia ka kam Shongknor jong ka KHADC u la shim khia ia kane ka kam ban ia kren bad ka tnad korbar Ri ban pynkynriah ia katei ka khyrdop ba ki paidbah kin iaid lynti khlem shah pyndik ha ki shipai.
