Shillong, Nohprah 10: Mynta ka sngi ka party BJP kala bteng ia ka jingpynrung kyrteng ia ki nongthep but kiba hap hapoh jong ka 17-North Shillong Konstitwensi hapoh jong ka party ha Raitsamthiah ha kaba da ki spah ngut ki samla ki long kmie bad ki long kmie kila wan ban pynrung kyrteng hapoh ka BJP.
U M Kharkrang wei na kiba pan tiket na ka party BJP na kane ka konstitwensi, haba kren ha ki lat pathai khubor la ong ba ha kane ka jingpynrung kyrteng bun na ki paidbah khamtam na ki shnong khasi kila ia wan ban pynrung kyrteng ia lade ha kaba la palat spah ngut kila dep ban pynrung kyrteng mynta ka sngi, la ong ba kane kan dang iaid bteng.
Ha kaba sdang kala shim por ban pynsngewthuh kaei ka jingthmu jong ka party BJP ha kane ka jylla Meghalaya bad kane ka jingwan pyniasoh bad ka BJP ka paw shai ba kila pdiang ia ka party ba kan wan ha ka bor synshar ha kane ka jylla namar haba kut ki sngewthuh ba dei tang kane ka pary kaba lah ban wan rah ia ki kam pynroi ha kane ka jylla.
Ka jingpynsngewthuh sha ki paidbah ia ka BJP ka long ba la ai nuksa na kiwei ki jylla kiba ka party ka trei kam, kata ka jingkynnoh da kiba pyrshah ia ka BJP la pynshai sha ki paidbah ba kane ka BJP kala synshar ha ka sien kaba ar ha Delhi hynrei kam pat don kawei ka iing mane ruh ban khang, kam pat don kata ka jingkhang bam doh masi la ong ba kine baroh dei ka jingpynsngewthuh bakla jong kito kiba pyrshah ia ka BJP.
Haba phai sha ka jylla la ong ba ki paidbah ki sngewthuh ia ka jinghiar ka jylla bad ki sngewthuh ba dei tang ka BJP kaba lah ban kyntiew ia ka jylla, haba ia dei bad ki samla la pynsngewthuh ia ki samla ia ki skhim kiba ka sorkar pdeng ka ai, kum ka MUDRA ka ram ba ki samla ki lah ban seng kam da kaba shim ia ka ram na ki Bank khlem da don nongbah khlieh.
Haba phai sha kane ka jingpynrung kyrteng la ong ba la dep ban pynrung kyrteg ha kibun ki bynta bad sha ki shnong khasi kane ka dang dei tang ka jingsdang bad kin dang iai bteng shuh shuh ha kine ki sngi ban dang wan, la ong u bah M Kharkrang.
