Shillong, Nailar 16: Ka KSU South West Khasi Hills District ka pynpaw iaka jingsngewsih bad ka phah ruh iaka kyrwoh sngewlem sha ka ing ka sem jong u bah Nidayophi Dkhar uba la khlad noh hadien ba ka Trok kit Debilat ba u la niah ka la hap haka riat ba jrong kumba 200 phut eiei ha shnong Mawsynram.
Kane ka jinghap kane ka trok kit dewbilat kala hap hajan kawei ka jaka ba marjan bad ka Krem Mawjymbuin, kane ka jingjia ba sngewsih ka la jia haka step sngi saitjain 13/08/2022 bad ia ka met jong u nongniah katei ka trok la lap ha ka 15 tarik sngi Nyngkong.
Ha kane ka jingjia ka la pynlong iaki samla naka shnong Mawsynram, ki dkhot ka seng, ka kynhun SDRF bad ki nongshongshnong jong ka Shnong Wapung ban wan ban iawad ia une u nongniah khnang ban ioh sei ia u na ka jingtap jong kane ka trok kit dewbilat Kat haduh ban da lap haka 15 tarik mynta u bnai.
Ka seng ka phah ia ka kyrwoh sngewlem sha kane ka longing ba la duh ia une u rangbah ha kane ka jingjia ba sngewsih bad kumjuh ruh ngi phah iaka jingkitbok kitrwiang ruh ia u nongbud jong kane ka trok ba la mynsaw bad don ha jaka sumar.
Shuh shuh ka seng KSU kala kynnoh ba katei ka jingkylla katei ka trok dei namar ka jingtorti jong u kontraktor ba maramot ia kane ka surok ha kaba u la shu pyndap daki byrni bala pyndap tang da ka khyndew ha ka jaka ban kynroh daki maw ha kane ka jaka ba la twa.
Ka KSU ka shim ba kane ka dei ruh ka jingpyntrei torti jongka ophis PWD Mawsynram Division. Kawei ruh ka daw ba ka seng ka la lap ka long ba ka dei ka jingrit palat jongka surok ha shilynter naduh Weiloi haduh Mawsynram bad Ranikor ha kaba kum ka seng ki sngew ba ka sorkar ka dei ban phai khmat ban shna bad pynheh ia shilynter kane ka surok khnang ba kan pynshngain iaki nongleit nongwan.
Kane kan long khamtam haba ka dei ka surok kaba da ki spah tylli ki kali ki iaid haka shisngi bad ruh ka dei ruh ka jaka ba riat kaba lada don ka jingjia hap Kali ne aksiden khlem artatien kan wanrah beit iaki jingjia ba sngewsih kumba la jia ia une u rangbah ba la duh ei iala ka jingim.
Ka KSU ka dawa ba dei ban phah maramot noh mardor haka rukom kaba paka ia baroh ki jaka ba don jingtwa , ban pynheh iaki jaka ba kham khim ha shilynter ka surok naduh Weiloi, Mawsynram, Balat bad Ranikor.
Ka KSU ka dawa ruh iaki nongmihmat naduh ki MLA bad MDC jongka Mawsynram Constituency bad Ranikor Constituency ba kin phai khmat lem halor kane ka bynta ban pynheh ia kane ka surok khnang ba kiba kum kine ki jingjia kin nym Jia shuh nangne shakhmat.
Ka seng ka ai khublei ia ki nongshongshnong ka Mawsynram , iaki dkhot ka KSU Mawsynram Unit bad kumjuh ruh ia kiwei kiwei pat kiba la shimkhia ban iawad ia une u rangbah ba la khlad bad ruh ban iarap lem ia u nongbud kane ka trok ban pynpoi sha ka jaka ban sumar. Kane ka dei ka kyrwoh na u samla Denishan Iawrod , Asst. Organising Secretary jongka KSU South West Khasi Hills District.
