New Delhi, Naitung 03: Ka Smart Cities Mission ka dei ka kam kaba kyrpang ha ki kam jong ka India ban kyntiew ia ki jaka sor. Naduh ba la sdang ia ka ha u Jylliew 2015, kane ka Mission ka la pyrshang katto katne ki sienjam ba saindur thymmai kum ka jingiakhun hapdeng ki nongbah ban jied ia ki 100 tylli ki smart city.
Ka jingjied ia ki projek da kito kiba iadon bynta ha kane ka kam, ka jingsdang ia ki smart city Special Purpose Vehicle ban pyntreikam, ka jingpyndonkam ia ka teknoloji bad ki kam digital ban pynbiang shuh shuh ia ki jingai jingshakri ki Sorkar ha ki jaka sor, ka jingpeit da ki kynhun na ki jaka ai jinghikai, ki jaka treikam ban peit ia ka jingseisoh ki kam bad kiwei kiwei pat.
Man ki 100 tylli ki nongbah ki la wanrah ia ki projek bapher bapher bad bun na kine ki long kiba kyrpang bad kiba dang pyntreikam ha ka sien kaba nyngkong bad ki kyntiew ia ka bor treikam jong kine ki nongbah bad ki jingshem ban pynurlong ia ka thong ban wanrah jingkylla ha ki nongbah.
Palat 8000 tylli ki projek ha ki kam bapher bapher ki dei kiba dang iaid shakhmat ha ki 100 tylli ki nongbah ha kaba ka jinglut jingsep ka long kumba T. 1.6 lak klur.
Haduh ka 3 tarik u Naitung 2024, kine ki 100 tylli ki nongbah ki la pyndep 7,188 tylli ki projek (90% jong baroh ki projek) kiba kot sha ka T 1,44,237 klur kum shi bynta jong kane ka Mission. Ki 830 tylli ki projek ba sah kiba kot sha ka T 19,926 klur ki dei kiba la jan pyndep.
Ha kaba iadei bad ka pisa pilain, ka Sorkar India ka la mang T 48,000 klur na ka bynta kine ki 100 tylli ki nongbah. Haduh mynta, ka Sorkar India ka la pyllait haduh T 46,585 klur (97% jong kaba la mang da ka Sorkar Pdeng) sha kine ki 100 tylli ki nongbah.
Na kane ka pisa ba la pyllait sha ki nongbah, 93% ka dei kaba la dep pyndonkam haduh mynta. Ka Mission ka la pyllait ruh ia ka jingkyrshan pisa ka Sorkar Pdeng hapoh ka Mission ia 74 tylli na ki 100 tylli ki nongbah.
Ka Mission ka la ioh shibun ki jingkyrpad na ki nongmihkhmat na ki Sorkar Jylla/ Nongbah, ban ai por shuh shuh ban pyndep ia ki 10% ki projek ba dang sah. Kine ki projek kiba dang sah ki dei kiba la jan dep hynrei kiba la slem namar ki jinglong jingman.
Ka jingpyndep ia kine ki projek ka dei ka ban wanrah ka bha ka miat ia ki briew ha kaba kin don bynta ha ka jingsuk ha ka rukom im ha ki jaka sor. Ha ka jingpeit ia kine ki jingkyrpad, ka Sorkar India ka la pynjlan ia ka por jong ka Mission haduh 31 tarik u Lber 2025 ban pyndep ia kine ki 10% ki projek ba dang sah.
La ai jingtip shaphang kane ka jingpynjlan ia ki nongbah ha kaba la batai ba yn ym don ka jinglut pisa shuh shuh ban ia kaba la mang hapoh ka Mission. La khmih lynti ba yn pyndep ia ki 10% ki projek ba dang sah shuwa ka 31 tarik u Lber 2025.
