Nongpoh,iaiong 17: Ka skul Pine Brook, kaba don ha Sumer Umbang, Ri-Bhoi district, ka la pynkut pynwai noh ia ka jingialehkai sports jong ka, ha kane ka Sngi Palei mynta ka taiew.
U Kongsan ha katei ka sngi u la long u Bah Donkupar Sumer, mMDC ka Umsning Constituency, uba dei ruh u Executive Member ka Khasi Hills Autonomous District Council (KHADC), Shillong, uba peit ia ka ,Youth Affairs, Market bad ka Mineral jong katei ka Council.
Haba kren kum u Kongsan, u Bah Don u la ai khublei ia ki nongpyniaid skul ki ba la pynlong ia kane ka lympung lehkai na ka bynta ki khynnah jong kane ka skul, kaba long kawei na ki lad ban kilan met bad ban ioh ruh ia ka met ka phad kaba koit kaba khiah bad ban pynproh ruh khambha shuh shuh ia ka jabieng ha ka jingnang jingstad
U la ong ruh ba u la iohi ia kane ka skul kaba dang donkam shibun ki lad jingiarap, ha kaba na ka liang jong u kum uwei na ki nongmihkhmat, u la shim ia ka bynta ban iathuh sha ki nongpyniaid skul bad sha baroh ki nonghikai skul ba un sa pynbeit ban pynmang jingiarap na ka skhim jong u.
Ha kane ka lympung sports, ki don saw tylli ki house ba la shim bynta da ki khynnah skul, kiba kynthup ia ka Nile, Tigris, Jordan bad ka Euphrates.
Ka Euphrates house ka la long ka kynhun lehkai kaba la wan nyngkong bad ioh khur bun point bha, ha kaba ka jingleh bha jong ka, ka la khur haduh 397 points, ka Jordan house kaba wan ba ar ka la khur haduh 345 points, nangta bud pat sa ka Nile house kaba la khur 283 points bad ka Tigris house kaba la khur 175 points, katba ka Euphrates house kaba la rah ia ka nam lahduh, ka la rah ruh ia ka nam kum ka Best March Pass bad tang ha ka March Pass ka la khur haduh 76 points.
Ki Best Athlete ha ka Senior Section ki long, na ka liang ki shynrang la rah da u Jeevan Thapa, na ka Euphrates house bad na ka liang ki kynthei pat ka Zenea Kharbyngar na ka Jordan house, katba na ka Junior Section pat, na ka liang ki shynrang la rah da u Francis
Khardewsaw na ka Jordan house bad na ka liang ki kynthei pat ka Ibakorshisha Nongneng na ka Nile house.
Kiwei kiwei kiba la sakhi ia kane ka lympung ki kynthup ia ki heh ka North Eastern Police Academy (NEPA), Umiam, Ri-Bhoi district, kiba la long kum ki symbud kongsan, nalor ki riew rangbah,
ki kmie ki kpa jong ki khynnah skul, ki nonghikai bad ki khynnah skul.
U Bah Donkupar Sumer kum u Kongsan, u la pynwai noh ia kane ka lympung lehkai sports ki khynnah kane ka skul da kaba pynhiar noh ia ka lama jong ka skul bad la iohsngew ruh ia ka school’s anthem ba la shim bynta da ki khynnah jong kane ka skul.(SP News)
