Shillong, Nohprah 09: Namar ka jingbympaw kitei ki dulir ha kaba shai hapoh ka Constitution Ri India, ka wanrah ia kaba bun ka jingeh ia ngi ki longdien mynta, haba ngi phai sha ka bor Shnong, Raid bad Hima, ka Ain long nongshong shnong, ka Ain register bad die Khyndew, ka ain halor ka jinglong trai halor ki mar poh khyndew, ki khlaw ki btap, ki um ki wah, ka jingmih ka jingdon beain ka jingbatai shaphang ka “Municipality of Shillong” hapoh ka Sixth Scheduled.
Ka jingbsuh lang ia ngi ki Khasi hapoh ka list ki Scheduled Tribes ha ryngkat kiba bun kiwei ki Scheduled Tribe kiba don ka juh ka hok hapoh ki Khasi States, bad bun kiwei kiwei ki jingeh kiba ngi iai kynduh namar ka jingbymshai ka jingbym pyntreikam ia ka IOA & AA kaba dei ka nongrim ka jingiasnoh jong ngi bad ka Ri India.
Mynta la 68 snem ka Federation of Khasi States ka iai buddien ia kitei ki hok bad ka sngewdei ban ong ba katba ki seng sain pyrthei ki political parties, kim ia syllok halor katei ka dulir ka jingiapyrta ban iada jaidbynriew ka long leh noh ei. Kumta ngi kyntu ia ki seng sain pyrthei (political parties) ban buddien ia kitei ki dulir kiban long ka stieh kaba kham skhem ia ka jaidbynriew bad ia ki longdien.
shuh shuh ki Khlieh Nongsynshar ki la ioh ia ka copy jong ka shithi 18 tarik July 2012 na ka Ministry of Home Affairs, (MHA) Sorkar India kaba la phah sha ka Sorkar Meghalaya kaba la phah kylla ia katei ka shithi pan jingshai na ki bor KHADC naduh u bnai September 2012, bad ia kaba ki bor District Council kim pat ai ia kano kano ka jubap haduh kine ki sngi.
Ha kawei ka liang ngi ia tyngkhuh bad ka Sorkar Jylla ka Sorkar India halor kiba bun ki Ain hynrei ha kawei ka liang haba pan jingshai ki bor Sorkar Jylla bad Sorkar India ngim shim khia ban jubap kane ka long kaba ktah ia ka hok jong ka Ri Khasi bad Jaintia baroh kawei.
Ka Federation of Khasi States, ka kyntu jur ia ki bor KHADC ba kin shim khia ban jubap kyrkieh halor katei ka phang khnang ba ka Sorkar Jylla kin lah ban phah lem ia ka jingai jingmut halor katei ka mat.
