Guwahati, Nohprah 01: Ka jingialang kaba ar jong ka ‘NITI Forum for North East’ kaba dang shu thung thymmai kan long ha nongbah Guwahati ha ka 4 tarik Nohprah, 2018 ha kaba u Vice Chairman NITI AAYOG, Dr Rajiv Kumar bad u Myntri khynnah ba dei peit ia ka tnad DoNER, Dr Jitendra Singh kin ia pyniaid lang ia kane ka jingialang.
Ha u bnai Rymphang, 2018, la thung ia ka ‘NITI Forum for North East’ ban peit bniah man ka por ia ka jinglong jingman ka roi ka par ha ka thain shatei lammihngi. Ka NITI Forum na ka bynta ka thain shatei lammihngi kadei ka thong ban ithuh ia ki jingeh bapher bapher ha ka liang ka roi ka par ha ka thain shatei Lammihngi jong ka ri bad ban ai jingmut ia ki sienjam kiba dei ban weng ia ki jingeh ba la lap.
Ki dkhot jong ka Forum ki long ki Secretary na ki Ministry bapher bapher jong ka sorkar India, ki Chief Secretary jong baroh ki phra tylli ki jylla ka thain shatei lammihngi bad kumjuh ruh ki heh ophisar sorkar bad ki riewshemphang na ki liang bapher bapher. U Secretary, North East Council (NEC) u long u dkhot jong ka Forum.
Ia ka jingialang ba nyngkong jong ka Forum la pynlong ha ka 10 tarik Iaiong, 2019 ha nongbah Agartala ha kaba la iatai shaphang ki jingeh bapher bapher. La lap ba ki jingpynbiang ia ki jingdonkam, ka kam rep, ki kam ba iadei bad ki siej, ki kam jngoh kai, ki mar bam, ka pule puthi, ka kamai kajih, ka koit ka khiah bad ka prokram “Made in North Eastern Region” kilong ki bynta ba kongsan jong ka roi ka par ha ka thain.
Ki jingiatai ha ka jingialang kin long shaphang ki jingeh ba iadei bad san tylli ki bynta ba kynthup ia ka kam jngoh kai pyrthei, ki kam ba iadei bad ki siej, ki kam ri dohkha, ki kam ri masi khem dud bad u slasha. Nalor ki dkhot jong ka Forum, la khot sngewbha ruh ia ki riewshemphang na ka sorkar, ki stad karkhana bad ki stad ai jinghikai khnang ban seisoh ka jingiaphylliew jingmut.
