Tura, Nailar 14: U myntri rangbah ka jylla u Dr . Mukul Sangma mynta ka sngi u la leit ban ia kynduh ia ki dkhot jong ka seng lehnoh GNLA kiba la wan ban pyndem wait kiba la buh hapoh jong ka 2nd MLP Bn Rehabilitation Camp ha Goeragre, ha jan Tura shuwa ka sngi rakhe ia ka jingioh Laitluit jong ka Ri.
Kane ka jingleit ia kynduh ka jong u ia kine ki dkhot ka GNLA kiba la wan ban pyndem wait ka long ban peit hi da lade aiu la leh na ka bynta jong ki ha kane ka jaka bala buh kyrpang ia ki ha dien ba kila wan phai sha ka jingim kaba thymmai baroh ki dkhot ka GNLA kiba la wan pyndem wait ki don 49 ngut.
Ha kane ka jingleit la synran lang ia u da u DC jong ka West GaroHills u Pravin Bakshi, DIG (Western Range) S.S. Kynjing ki nongialam niam bad u nonglam ktien u Rev. F.D.Sangma bad u Commandant 2nd MLP Bn C.B.S Reddy.
Kine ki lehnoh ki dei kiba la wan ban pyndem wait ha khmat ka sorkar ha u bnai Jymmang bad labuh nungkong ia ki ha 4th MLP Bn Sophian, West Khasi Hills, hynrei la rah noh ia ki sha ka 2nd MLP Bn Goeragre ha Tura.
U myntri rangbah u la pynpaw ia ka jingsngew kmen ba u lah ban ia kynduh bad ki ba kila wan phai biang sha ka lynti kaba dei bad kane ka jingkmen ka long ruh ia kiba ha iing ha sem bad kum juh ia ki paidbah jong ka Garo Hills baroh kawei.
My myntri rangbah u la kyntu ia ki ba kin iaid sha khmat kaei kaba ki kwah ban trei nangne sha khmat ba kin ioh ia ka jingim ba dkim dei ban peit ia ka lynti kaba lyngkot ha ka jingim bad u la ong ba ki dei ban shim kilad ki lynti kumno ban jam sha khmat ha ka jingiaim ia kaei kaba ka sorkar ka don ban ai.
Na ka liang jong u myntri u la bthah ia ki heh sorkar ba kin hikai ia ki ha ka rukom ba ki lah ban seng ia la ki jong ki kam ki jam ha kaba ka sorkar kan peit ia ki lad ki lynti ban ia rap ia ki bad la bthah ia ki heh sorkar ban ialam kai ia ki ban iohi kaei kaba la jia ba lang ha kiwei ki bynta kum ha Dawki bad Mawlyngnong.
