Shillong, Naitung 14: U Myntri Rangbah ka jylla u Conrad K Sangma mynta ka sngi u leit sha Delhi ban ia kynduh ia ki bor jong ka sorkar pdeng ban pan jingiarap ha kaba ia dei bad ka jingshah pynjulor ka jylla ha kine ki sngi namar ka jingjur slap.
Katkum ki thymmei khubor kiba la ioh da u SP News Agency, u Myntri Rangbah ka jylla ha dien ba u la wanphai na ka jingleh niam Behdienkhlam ha Jowai u la leit sha Delhi ban ia kynduh ia ki bor jong ka sorkar pdeng ban pan jingiarap namar ka jylla Meghalaya ruh kala shah ktah shibun eh ha ka jingther jong u slap ha kine ki sngi.
Ha kane ka jingther jong u slap ha kine ki sngi ki sngi ka jingshah ktah kala long ha jan baroh ki District jong ka jylla, hynrei kaba la shah ktah palat ka dei ka East Khasi Hills ba ka jingtwa khyndew kala ktah eh ia ka Mawsynram Konstitwensi bad ka West Garo Hills District.
Ha ka jingshisha mynta ka sngi u myntri rangbah ka jylla u la dei ban leit jngoh ia ki jaka shlei Um ha West Garo Hills District bad kiba la shah ktah eh ki dei ka Rajabala bad ka Pulbari Konstitwensi, namar ka jingbym long ka suin bneng la hap ban pynsangeh noh bad un sa leit ban jongoh yn da la wan phai na Delhi.
