Shillong, Naiwieng 24: U Dr. Mukul Sangma mynta ka meit u la leit ban ai ia ka shithi sha u Speaker ka iing dorbar thawain ka jylla u bah Metbah Lyngdoh ban pyntip ba ma u bad ka kynhun kila mih na ka party Congress hapoh ka iingdorbar thawain ka jylla Meghalaya.
Ia ka shithi ba ki 12 ngut ki MLA Congress kila mih na ka party la phah mynta ka meit bad da kaba leh kumne kitei ki MLA jong ka Congress kila lah ban pynpaid ia ka Parliamentary Party jong ka CLP hapoh ka iing dorbar.
Ka Party Congress ka don 17 ngut ki MLA hapoh ka iing dorbar mynta bad da ka jingmih noh ki 12 ngut ki MLA ka long ba kila lait na ka ain kyntiap seng ha kaba kila lah ban mih bad ban thaw ia ka kynhun kaba thymmai hapoh ka iing dorbar thawain ka jylla.
Katkum ki thymmai khubor kiba la lah ban ioh la sngewthuh ba u Speaker ka iing dorbar thawain ka jylla u bah Metbah Lyngdoh yn sa khot ia ki 12 ngut ki MLA kiba la soi ia ka shithi ba kin pynshisha ba kila soi ia ka shithi ba ki la mih na ka party Congress.
Ki thymmei khubor ki iathuh ba la shai ka sngi ki 12 ngut ki MLA kiba la mih na ka party Congress hapoh ka jingialam jong u Dr Mukul kin sa leit ban pynshisha ia lade ha khmat jong u Speaker ba kila mih na ka party Congress bad ban kyrpad ia u Speaker ba un ithuh noh ia ki hapoh ka iing dorbar dakawei ka kynhun ym shuh na ka Congress.
