Shillong,Iaiong 01: U myntri rangbah jong ka jylla Assam U Sarbanada Sonowal bad u myntri rangbah ka jylla Meghalaya u Dr Mukul Sangma mynta ka sngi kila ia kynduh ha Brahmaputra guest house ha Guwahati ban ia kren halor ka kam pud kam sam hapdeng kine ki ar tylli ki jylla kaba la sah teng mynta la bun bun snem. Kane ka jingiakren kam pud hapdeng ki myntri rangbah kala long biang ha dien hynniew snem. Ha kane ka jingiakynduh la ia kren ia kaei kaei na ka bynta ka jingmyntoi lang hapdeng kine ki ar tylli ki jylla.
Ha kane ka jingiakren mynta ka sngi baroh ar ngut ki myntri rangbah kila ia rai ban pyniaid sha khmat ia kane ka jingiakren ban dup lah ban ia pynbeitnoh ia kane ka jingia kajia pud ha pdeng kine ki ar jylla bad la shim ia ka rai ba ai kane ka jingiakren kaba mynta ka sngi kan buh ia u mawmer ban poi sha ka thong ha kaba ia dei bad kane ka kam pynbeit pud da ka jingiakren ia sngewthuh jingmut. Ha kane ka sngi la ia mynjur lang hapdeng kine ki ar ngut ki myntri rangbah ban ia buh mawpud ha khappud da ka jingiasngewthuh jingmut lang.
Da ka ka thung ia ki mawpud, kan long ka lad ban pynbeit ia kane ka jingia kajia pud kaba la long ka daw bah hapdeng kine ki ar tylli ki jylla, ia kane hap ban leh da ka jingiamynjur lang jong baroh ki briew na kine ki ar tylli ki jylla. Ha kane ka sngi la rai ba kan don ka jingiakynduh hapdeng ki Chief Secretary ba kin ia pynbeit ia ki jingeh bad ba kin ia poi sha ka jingiamynjur lang ha kaba yn ia pdiang lang da baroh ar liang.
Ha kane ka jingiakynduh mynta ka sngi, na ka liang jong u myntri rangbah ka jylla Assam, u la kren halor ki kam lehnoh, ki kam rahbor, ki kam lute kaba la leh da ki riew sniew ha South Salmara bad Mancachar District hapoh ka jylla Assam kiba ia khap bad ka Garo Hills District jong ka jylla Meghalaya. Ha kaba ia dei bad kane u myntri rangbah ka jylla Assam u la ong ba don kam ban ia treilang ban tehlakam ia kine ki kam sniew ia kiba la leh da ki lehnoh jong ka jylla Meghalaya ha kahppud kum ka jingrahbor, ka jingdawa pisa ban khanglad ia kine ki kam sniew don kam ia ka jingiapyntip lang ha ka liang jong ki bor syntiat ban wanrah ia ka jingshong suk.
Ha ka juh ka por u la ong ba ki briew jong ka jylla Assam bad Meghalaya ki don ka jingiadei kaba don na duh kip or barim bajah bad ka thong ban iada ia ka mariang ka dei ban long ka phang kaba ha khmat eh ba dei ban lehnoh da ka sorkar Assam bad Meghalaya , u myntri rangbah ka jylla Assam u la ong ba dei ban leh ei ei ban khang ia ka jingot ia ki lum ha ki bynta jong ka jylla Meghalaya namar ka jingshlei um hapoh ka nongbah Guwahati dei na ka daw ba ka don ka jingot ia ki lum ha ki khappud jong ka jylla Meghalaya.
Na ka liang jong u Myntri rangbah ka jylla Meghalaya u Dr Mukul Sangma u la pynpaw ia ka jingkmen ka jong u ba u la shah khot sha kane ka jingiakren kaba mynta ka sngi ha Guwhati jong ka jylla Assam, u Myntri rangbah ka jylla Meghalaya u la ong ba ka sorkar Meghalaya kala lah ban tem ia ki kam sniew ha khappud bad u la kyntu ia ka sorkar jong ka jylla Assam ba kan ai ka jingiatreilang ba pura ban ia leh pyrshah ia kine ki kam sniew kiba jia ha khappud hapdeng jong kine ki ar tylli ki jylla, khamtam eh ia ki kam lehnoh bad ki kam sniew kiba bun jiat.
Namar ka jylla Meghalaya ka shaniah ia ka jingioh jingkot jong ka ha ka rep ka riang ha kaba ia dei ha ka liang jong ka ioh ka kot, u Myntri rangbah ka jylla Meghalaya u la ai ka jingkular ba ka sorkar Meghalaya kala shim ia ka rai ba pynlong ia ka khaii pateng hapdeng kine ki ar tylli ki jylla kaba suk ba sain ban ailad ia ki briew jong ka jylla Assam ba kin lah ban wan ia khaii pateng ban thied ia ki mar rep na kane ka jylla khlem da don kano kano ka jingsngew syier.
Ha kane ka jingialang u myntri rangbah ka jylla Meghalaya u la ai ka jingkular ban khang ia kane ka jingot ia ki lum, ha ka juh ka por u la ong ba ka jylla Meghalaya ka ia khap bad ka Bangladesh bad ka ka pud ka sam ka long haduh 433 km, ban khanglad ia ka jingwan rung tuh jong ki briew na ka thie ka ri bad ban the la kam ia ki kam sniew ka long ka jingkhuslai ia ka sorkar bad kane kam dei tang ia ka jylla Meghalaya hynrei wat ia ka jylla Assam ruh kum juh.
U myntri rangba ka jylla Meghalaya u la ong ban ia leh ia ka kam don kam ia ka mon ba skhem na ka liang jong ki nongialam seng sain pyrthei ban pynurlong ia kane bad kane kan wanrah ia ka jingshong suk shongsain ha kane ka dong shatei lam mih ngi bad kan iarap ban kyntiew ia ka raoi ka par jong kane ka thian baroh kawei la ong u Dr Mukul.
U myntri rangbah ka jylla Meghalaya u la ban jur ba ka dei ban don ka jingialang ha pdeng ki ophisar kiba dei na ki District ha pdeng jong kine ki ar tylli ki jylla ban wanrah ia ka jingsngew jan bad ka jingiatreilang ha kahppud, na ka liang jong ka jylla Meghalaya kiba la leit ban synranlang ia u myntri rangbah ka jylla ha kane ka jingiakren ki long u Bah DD Lapang, myntri kam ain kong Roshan Warjri , Myntri kam bor ding bah Sngewbhlang Dhar, Deputy Chief Minister Dr RC Laloo bad kiwei ki heh sorkar ka jylla.
Katba na ka jylla Assam la don lang u myntri kam khlaw u P R Brahma, PWD minister u P. Suklabaidya, myntri khynnah kam bor ding u PL Das, u nongai buid ia u myntri rangbah ka jylla Assam u H Goswami lem bad kiwei kiwei ki heh sokart.
