Shillong, Nailur 24: Ka HYC Mawlai circle mynta ka janmiet 24/9/2020 hapoh ka jingialam u President Bah Donboklang Kharlyngdoh ka la hiar kyrkieh sha ka shnong Mawlai Umthlong, Lummawnei ban jurip ia ka jingshah ban khyndew jong kawei ka longiing kaba dei jong I Kong Waddalin Mylliemumlong.
Ha kane ka jingjurip la ioh jingtip ba katba ki 3 ngut ki khun ki dang don hapoh ka kamra shetja ban bamja ha ryngkat u kpa, la wan ka jingtwa kynsan jong ka khyndew na sha lyndet iing, mar Kumta ym pat shem la ioh leh ei ei, ka khyndew ka la ban ia ka iing ha kaba ki khun ki la shah tap.
Hynrei lyngba ka jingiarap jong u kpa bad ki Marjan marpa la la lah ban sei ia kitei ki khun, kita ki long Ibalincy Mylliemumlong 8 snem, Lumlang 6 snem bad Iaiieitlang 2 snem shiteng.
Ka HYC ha kane ka sngi ha ryngkat ka jingdon lang u Rangbah Shnong Bah Tyllilang Mylliemumlong ka ioh ban kner ka jingiarap kaba rit eh lyngba ka pisa , ia kane ka pisa la ai sha u kpa Bah Resterly Ryntathiang kum ka jingiarap ba kyrkieh na bynta ba kin ioh jingsumar noh kham kloi hapoh Hospital. Ia kitei ki khyllung baroh 3ngut la kit mar mar sha civil hospital.
U Bah Donboklang Kharlyngdoh haba ai jingkren u la ong ka seng da ka mynsiem sngewkhia ka wan sha kane ka jaka mar ia ioh jingtip na ki briew, ba la don ka jingban khyndew ia ka ka iing ha Umthlong Lummawnei.
Ha kum kine ki jingjia, ka seng ka sngewpap Lada ngi shu shong kli kti tang ha ki rympei iing, te Kumta ngi wan beh khnang shane. Hynrei sngewkmen ba ka mynsiem iatiplem jong ki Marjan marpa bad ki bor Shnong, la pynlong ia ki ba ki la lah ban pyllait Im na katei ka jingban khyndew.
U la Ong ka seng ka kitbok kitrwiang ia kitei ki khun ba kin ioh jingsumar noh kham kloi hapoh Hospital. U la kyntu ruh ia u MDC bad MLA jong ka Mawlai constituency ba kin phai khmat lem sha katei ka longiing.
U Rangbah Shnong ha kane ka sngi u pynpaw ka jingsngew nguh ia ka HYC Mawlai circle kaba la kloi ban wan mar mar sha ka shnong Jong ki ban iarap lyngba ki kti basbun jong ki.
