Tura, Iaiong 20: Na ka daw jong ka jingpom pyrthad lai ngut ki briew kila mynsaw ha ki bynta jong ka Rilum Garo bad ia kine ki briew la wan rah hapoh jong ka Tura Civil Hopsital ban sumar ia kine kiba mynsaw.
Ha ka sngi Balang ha ka por jan miet ar ngut ki briew kila mynsaw ha ka jingpom pyrthad ia kaba la jia ha ka shnong Tebrongre kaba hap hapoh jong ka West Garo Hills District bad kine kiba la ioh jingtip da ki pulit la tip kyrteng kum u Beston Sangma 21 snem bad u Binitsan Marak 41 snem.
Na kaliang jong u Superintendent ki Police jong ka West Garo Hills District haba kren ha u SP News Agency la iathuh ba kane ka jingjia kala jia ha ka sngi Balang por jan miet, ia kaba la jia ha Dalu mynta ka sngi pat kim pat ioh jingtip.
Ki thymmei khubor ki iathuh ba mynta ka sngi ha ka por kumba 3.30 baje jan miet kala don ka jingpom pyrthad ha Dalu ha kaba kawei ka kynthei briew kala mynsaw bad la wanrah ia ka sha Civil Hospital Tura na ka bynta ban ai ia ka jingsumar.
