Shillong, Risaw 05: Ki suba lehnoh GNLA mynta ka sngi dang step phyrngap kila pynlait noh ia ki khyndai ngut ki nongkhaii na Assam kiba wan iew ha Silkigre ha ka 29 tarik jong u bnai ba la dep.
Kat kum ki khubor kiba la ioh la ong ba kine ki nongkhaii kila lait ha dien ba ki la siew hynñiew lak tyngka sha ki nongrahbor kiba la suba ba dei ki lehnoh GNLA.
U SP jong ka South Garo Hills u Anand Mishra, u la iathuh ba kila ioh jingtip ba ki nongkhaii kiba la shah rahbor la pynlait ia ki mynta ka sngi ha jan ka shnong Silkigre. La ong ba ki pulit kila ioh jingtip ia kane hynrei kine kiba shah rahbor kim shym la leit ban ia kynduh iaki pulit namar mar ia lait kila phet bak sha la ki jong ki shnong.
Kine ki nongkhaii baroh ki dei na Mankachar jong ka jylla Assam, kine ki dei kiba juh leit sah sha kane ka iew kaba juh long man ka taiew hynrei ha katei ka sngi ki suba lehnoh GNLA kila pynap da ki suloi baroh ia ki.
Na ka liang jong ki pulit ki dang pynlong ia kane ka jingthwet ia ki lehnoh ha katei ka thaiñ la ong u SP jong ka South Garo Hills District u Annad Mishar.
