Shillong, Naiwieng 11: Ka jinglehniam jong ka iing syiem Khyriem, kaba dei ka bynta jong ka Shad Nongkrem la pyndep mynta ka sngi da ka Pomblang Iewduh ha Lum Pomblang ha Smit ha ka jingiadon ki paidbah paidlang ban skhi lang ia kane ka jinglehniam.
Ban poi sha ka jaka Pomblang Iewduh kaba don ha jrong lum ha Smit, la mih paidbah na iing jong ka Syiem Sad ha ryngkat ka pud ka tem ka riam tynrai, ha ryngkat ka siat suloi katkum ka riti dustur kaba la pynneh pynsah naduh ki por hyndai ba sdang ka jinglehniam.
Ia ka khoh bala thep ia ki tiar lehniam ban pyndep ia ka pom blang Iewduh la kit bad rah da ki nongrap ha ka khoh bad ha u khiew bad kiba kit ia kane ka khoh bad rah ia u khiew ym bit ba kin kyrtiang dien hapor ba ki leit sha Lum Pomblang bad haba ki wan phai ruh kim bit ban kyrtiang dien haduh ban da poi sha iing sad.
Ha kane ka jinglehniam iing Syiem la knia da u wei u syiar saw bad u blang rangbah ba lieh sada ia kaba la pyndep ia kan niam ka rukom da u lyngdoh bad ia ka wait ban pom ia u blang la aiti da u Syiem ka hima sha u ban pom ia u blang ban pyndep ia ka niam ka rukom.
Ha kane ka sngi na ka liang jong ka sorkar la wan ban sakhi da u myntri rangbah ka jylla u Cornad K Sangma, la don lang u MLA jong ka Mawryngkeng u bah Pyniaid Sing Syiem, ki riew rangbah ka hima Khyriem ryngkat ki khun ki hajar jong ka Hima ha ryngkat ka shad da ki rangbah ha katei ka madan ha kane ka sngi pynkut ia lehniam ka iing syiem ka Hima Khyriem.
Ha kane ka jingiaid paidbah na Mawdan iing Syiem sad sha Lum Pomblang kala don ka jingsiat suloi ha baroh shilynter haduh ban da poi ha ka jaka lehniam bad kane ka jingsiat suloi ka long ruh ha ka por ba la pom ia u blang Iewduh ha kane ka jinglehniam.
