Shillong, Lber 15: Ka seng Hynniewtrep Youth Council (HYC) mynta ka sngi kala phah da ka jingthoh shah u myntri rangbah ka jylla u Conrad K Sangma, Symbut myntri rangbah ka jylla bah Prestone Tynsong bad ha u Director General ki pulit ban pynjlan ia ka rta thep kam ki samla ha ka tnad sha ka 30 snem ka rta.
Ha ka shithi kaba la phah mynta ka sngi ia ka shithi kaba la soi da u president ka seng u bah Roy Kupar Synrem la kdew ba na ka daw jong ka COVID-19 ka sorkar kam shym la lah ban khot thep kam ia ki samla bad kane kala ktah ia ka rta jong ki.
Kumba na ka liang jong ka seng ka kyntu ia ka sorkar ba kan pynjlan ia ka rta thep kam hapoh ka tnad pulit sha ka 30 snem ka rta ban ailat ia kito kiba la palat ia ka 26 snem ka rta kumba la kdew ha ka jngpynbna khot thep kam ka tnad pulit.
Ka seng ka thoh ia kane ka shithi halor ka jingsngewkhia ba nym ailat ia ki samla wat kam ba kin nymiaid sa kam tang na kine ki rule ki kyndon kiba ka sorkar kala pynmih kum kine ki polisi, kumta ka seng ka kyntu ia ka sorkar ban wengnoh ia ka jingpynbna ban thep kam pulit bad khot biang noh da kawei.
