Shillong, Iaiong 17: Ka Deputy Commissioner jong ka East Khasi Hills District ka kong Isawanda Laloo mynta ka sngi ryngkot ki nongkit kam shnong ka shnong Mawshabuit, u Dy Commandant ka 58-Gorkha Training Centre ha Happy Valley ryngkat u SP ka East Khasi Hills District kila leit ban jurip lang ia ka khyrdop jong ka 58-GTC ha Mawshabuit.
Ka jingthmu jong kane ka jingleit jurip ka long namar kala mih ka huri hura kaba la wan rah ia ka jingiamynsaw ha katei ka khyrdop ha kine ki khyndiat sngi kiba la leitnoh bade kane ka jingleit jurip ka long ban weng ia kane ka jingeh kaba ki paidbah ki ia kynduh jingeh na ka por sha ka por ha katei ka jaka.
Ha dien ba la leit ban jurip kala don ka jingialang bad ha kane ka jingialang la shim ia ka rai ba ka kynhun shipai kin shim noh mardor ia ki lat ki lynti kumno ban weng ia kane ka jingeh kaba ki paidbah ki ia kynduh ha kane ka khyrdop.
Haba ia dei bad ka jingdawa ban weng noh ia ka khyrdop na kane ka jaka yn thung ia ka kynhun ban peit bniah ia kane ka bynta bad ban ai jingmut sha ka sorkar ba kan shim ia ki lat ki lynti ban ia kren bad ka tnad korbar Ri.
Ha kane ka kynhun kan hap ban peit ruh ym tang ia ka jingeh jong ki paidbah nongshong shnong hynrei kin peit ruh ha kaba ia dei bad ki kam iada ri, halor kane kan don ka kynhun ban ia peitlang bad ia kane yn khlieh da u ne ka Magistrate, kin don ki pulit ophisar bad Adjutant bad lai ngut ki nongkit kam shnong ban ia peit ia kane na ka por sha ka por.
Ban pyniaid ia ki kali ha kane ka jaka u Superintendent ki pulit jong ka East Khasi Hills District yn buh ia ki pulit ban pyniaid ia ki kali bad kan ruh ka jingiatreilang na baroh ban weng ia kane ka jingeh da ka jingiatreilang.
