Shillong, Jylliew 08: Ka jing angnud ban ai ka jingshakri kaba khuid ha ryngkat ka jing wanrah ia ki kam pynroi kadei ka thong kaba hakhmat eh jong u Bah Banteidor Lyngdoh kaba la kyrsoi na ka thwei dohnud bad ka sain pyrkhat jong utei u Rangbah Nongialam naduh ba u tei u Rangbah u la rung sha ka kam sain Hima.
Ki Paidbah jong ka Mawkynrew Constituency ha kane ka kynti kaba mynta ruh kila sakhi ia ka mynsiem shakri jong utei u Rangbah Nongialam u ba kila pynkup bor ia u kum u MDC u la Plie Paidbah ia ka Jingkieng iaid kjat jong ka Wah Umsngad, Dong Wahshnong kaba hap hapoh jong ka Shnong Jongksha hapdeng ka jingialang kaba i shongkun ha kaba la wan ban sakhi da kiba bun ki Riew Rangbah, Ki Longkmie bad ki Khun samla jong ka Shnong Jongksha.
Kane ka jing plie paidbah ia ka Jingkieng jong ka Wah Umsngad kaba la bei tyngka da utei u MDC jong ka Mawkynrew Constituency lyngba ka MDC Scheme kala long shisha ka jing kyrkhu kaba khraw eh ia ka shnong hi baroh kawei bad ia kane la pynpaw da baroh ki Nongkren kiba la ai jingkren ha katei ka jingialang namar ba kadei ka jingangnud ha kaba ki Paidbah Nong Shong Shnong ki la shu ap kyrmen mynta da ki phew phew Snem naduh mynba u Bah Martle Mukhim uba long kum u MLA/MDC, hadien kata la wan sa u bah Remington Pyngrope kiba la khlei ia ki Kular phewse ki shu kut tang ha ka Ktien.
Ki Nongkren ha katei ka sngi ki la pynpaw ruh ba kane ka jingkieng jong ka Wah Umsngad kalong kaba donkam haduh katta katta bad ka long ruh kum u budlum na ka bynta jong ki Paid Nongrep bad ki Paidbah Nong Shong Shnong kiba im da ka kam ri jing ri namar ha kine ki Phew snem kiba la leit noh ki paid Nongrep bad ki Nong Ap Masi kiba im jakpoh na shiliang jong katei ka wah namar kalong ka jaka kaba seisoh haduh katta katta hynrei tang shu kem Iong rein ka bneng bad kyrhuh dum slap ka bneng ki hap ban ieh noh iala ki kam ki jam baroh namar kin sa mad ia ka jingsah um. Ki Nongkren ha katei ka sngi ki la ai ruh ka jingkyrkhu kyrdoh bad kitbok kit rwiang ia u Bah Banteidor Lyngdoh da kaba ong ba ki Paidbah nongshong Shnong kin sa siew kylliang ia ki jingleh bha bad jing shakri Hok jong utei u Rangbah Nongialam da kaba kin sa pyn kiew Klass noh ia u kum u MLA ha u snem 2018.
Haba kren kum u Kongsan ha katei ka sngi na ka liang jong u Bah Banteidor Lyngdoh u la ong ba kum u Nongmihkhmat ha i bor iba rit kum u MDC, u la pyrshang ban ai ia ka jingshakri kaba janai tam bad kaba khuid kaba suba ban sam ia baroh ki schemes haba shit haba shai khlem ka jingleh shiliang khmat iano iano ruh na ka bynta ka jingbit jingbiang jong ka Constituency hi baroh kawei, ha kaba u la ong kumba ki paidbah ki la pynkup bor ia u kum u Nongmihkmat un pyndep hok iala ka jong ka kamram da kaba ong ba “nga dei u shakri jong phi u paidbah & ki paidbah jong ka mawkynrew constituency kidei ki kynrad” ha kaba u la bynrap ruh ba um kwah ban put turoi ialade hynrei to ai ba ki kam kin kren khamjam ban ia ka ktien.
Hashwa ka jing plie paidbah ia ka Jingkieng (Footbridge) jong ka Wah Umsngad ha katei ka sngi u Bah Banteidor Lyngdoh u la leit ruh ban plie paidbah ia ka lynti iaidkjat (Footpath) ha ka Dong Namlang, Wahshnong. Ia ka jingialang ha katei ka sngi la pyniaid da u Bah Renew Kharmulieh, Rangbah Dong Wahshnong, Kiwei pat ki Riew Rangbah kiba la ai jingkren ha katei ka sngi ki kynthup ia u Bah Ephring Kharmylliem, Rangbah Dong Pdeng Shnong, Bah Drop Nomngpluh, Sordar barim jong ka Shnong Jongksha, Bah Shonroy Rynjah, Secretary Shnong Laitkyrhong, Bah Nobenstar Nonglyer, Rangbah Dong Nongshiliang bad i Kong Elisha Kharmylliem iba long iwei na ki Longkmie ba Pawkhmat na Wahshnong.
