Sohra, Risaw 12: Ka myntri ba dei peit ia ka tand pule puthi jong ki skul rit ha kane ka jylla Meghalaya ka Debora Ch Marak, ha kaba kren kum ka kongsan ha ka jingrakhe ia ka jingdap 175 snem jong ka skul Sohra TWA Presbyterian Lower Primary School, ka la ong, “ ngim dei ban shaniah ha ka jingmang bhah kyrpang, namar ngi nim ha kane ka juk jong ka jingiakop, kane ka long ka khubor kaba nga phah sha baroh ki khynnah skul jong ka jylla”.
Ka myntri kala pynpaw ia ka jingsngewdiaw jong ka ba kane ka nongbah Shillong kaba la niew b aka dei ka shlem jong ka jaka pule puthi, mynta kala duh noh, na ka liang jong ka sorkar kan ialeh ban wanrah biang ia katei ka burom la la jah, ban pynlong ia ka nongbah Shillong sa shisien ka pdeng jong ka pule puthi, khnang ba ki briew na sha bar kin wan sha kane ka jylla ban pule.
Ha ka juh ka por na ka liang jong ka myntri kala kynti ia ki samla pule ba lada kim ioh rung ha ki skul bad ki college kiba bha haba ki leit ban pule sha bar ki dei ban pule ha Shillong namar, ha Shillong ruh ki don ki skul kiba bha kumba long lem kiwei. Lada kwah ban ioh skul sha bar kid ei ban trei shitom bad ki dei ban ioh ia ki mark jong ki la kumno kumno 95% shaneng, ka la ong.
Halor ka memorandum ba la ai da ka skul, na ka liang jong ka myntri kala ong ba kam pat ioh ban pule ia ka, hynrei kala ai ka jingkular ba ia kaei kaba don kam na ka liang jong ka sorkar kan ai ia ki jingkyrshan ia kane ka skul. Ka long ba ka jinglong jingman jong ka pule puthi ha kane ka jylla Meghalaya ka dei na ka jingdon ki missionary.
Shuwa ban leit sha katei ka leh burom ia kane ka skul ka myntri kala leit jngoh ia ki ar tylli ki skul ha Sohra, kawei ka St John Girls School Sohra bad ka Maurice Patrick King memorial Secondary Scholl ha Laitryngew, na ka liang jong ka myntri kala ia kren bad ki khynnah pule jong kine ki ar tylli ki skul.
Kiwei kiba la kren ha kane ka jingrakhe jong ka Sohra TWA Presbyterian Lower Primary School ia jingdap 175 snem ki long u MLA jong kane ka jaka u Bah T.W Chyne, u MDC jong ki, u Bah D Wahlang, kiwei kiba la ia don ki long u Syiem jong ka hima sohra, ki ophisar jong ka tnad pule puthi jong ka sorkar na Sohra Civil Sub Division bad ki nongpyniaid balang. Ia ka jingkren lyngkot haba ia dei bad ka skul la kren da ka kong M L Diengdoh.
