Shillong, Iaiong 16: U pastor Rev N O Kharlukhi, ha ka sngi sait jain u la plie ia ka skul jong ka Balang Presbyterian ha ka shnong Mawmadoin kaba hap hapoh ka jingpeit jong ka balang Nongum presbytery. Ia kane ka iing skul la ai sngewbha da ki lai ngut shipara sha ka Balang na ka bynta ban seng ia kane ka skul ia kaba la ai kyrteng Lawmadion Presbyterian LP Skul.
Kane ka shnong Lawmadion ka don kumba khatsaw tylli ki long iing bad haduh mynta kane ka shnong kam don kano kano ka skul, ki khynnah jong kane ka shnong ki hap ban leit skul sha kiwei pat ki shnong ba mar jan kum sha Riangmang. Na ka liang jong ka jingiaseng kynthei jong ka Nongum presbytery kala iohi ia kane ka jingeh bad kala shim ia ka rai ba kin plie noh da ka skul hapoh jong katei ka shnong ha dien ba kila ioh ia kane ka iing da ka jingsngewbha jong ki lai ngut shipara ia ka iing jong ki sha ka Balang.
Na ka liang jong ka jingiaseng seng kynthei jong ka Balang Presbyterian Nongum, ban pynurlong ia kane ka jingthmu ka jong ki kila pdiang sngewbha ia ka jingai jong ki lai ngut ki khunswet ia ka iing jong ki sha ka Balang ban seng ia kane ka skul da ka jingiamynjur lang jong ka kmie mrad ka kong Himai Jana.
Ia kane ka skul kaba la plie thymmai la jer kyrteng kum ka Lawmadion Presbyterian L P School. Ha kane ka sngi plie ia kane ka skul na ka liang jong ka jingiaseng kynthei hapoh ka jingprad lynti jong u Bah Boldness L Nongum kila sam ruh ia ki pla kot bad ki kot sha ki khynnah jong skul jong kane ka shnong. Na ka liang jong u Bah Boldness ha ka jingkren jong u la ong ba un wad ki lad ki lynti ban iarap ia kane ka skul.
Kiwei kiba la ai jingkren ha kane ka sngi ki long u sordar jong kane ka shnong u Bah K Lawryniang, u Rev A. Rymmai, ka kong S Nongsiej secretary jong ka jingiaseng kynthei Nongum presbytery. Ha kane ka sngi plie ia kane ka skul la pynphuh pynphing da ka jingiadon ryngkat jong ki ki kmie ki kpa jong ki khynnah skul ban ia sakhi lang ia kane ka sngi sah kynmaw.Ia ka jingialang la pyniaid da ka kong BB Lawrynniang kaba dei ka Chairperson jong ka balang Nongum Presbytery.
