Shillong, Lber 21: Hadien ba la mih ha ki khubor ha kaba ia dei bad ka jingduh noh ka KPC ia ka kam ban tei ia ka Shillong Medical College, ka Khasi Students’ Union (KSU) kum ka seng ka sngewkhia shikatdei eh halor ki kynrum kynram kiba mih ha kaba ia dei bad katei ka Medical College. Ka KSU ka sngewthuh ba kat dang mih ki kynrum kynram, katta ka lad ban sahkut lane duh syndon ia katei ka skulbah kan dang wan.
Halor kane ka mat ba kongsan kaba lah ban kyntiew shikatdei eh ia ki samla pule kiba thmu ban pyntbit ha ka lain medical mynta ka janmiet ka 21 tarik u Lber 2022, ki dkhot ka KSU kiba kynthup ia u samla Lambok Starwell Marngar President, u samla Donald V Thabah General Secretary ryngkat ki dkhot ka seng ki la leit ban ia myntri ka tnad ka koit ka khiah u James P Sangma, ban pan jingpynshai halor ka Shillong Medical College.
Na ka liang u myntri u la kubur ha khmat ka KSU ba ia kane ka kolej yn ym pynduh pyndam da leilei ruh em. U la iathuh ruh ba ka jingtei ia kane ka kolej ka sahteng naduh ki snem kiba mynshwa namar kiba bun ki daw ki bym lah kiar. U la ong ruh ba kane jingpynbeit bad ka KPC kam lah ban poi shano shano ruh.
U Myntri la ong ba dei na kata ka daw ka sorkar kam banse ban weng noh ia ka soskular ba la ia soi bad kane ka kompeni naduh mynshwa. U James u la pyntip ruh sha ka seng ba shen ka sorkar kan sa khot paidbah biang ia ki kynhun kompeni ban sdang noh shaid shaid ia ka jingtei ia ka Shillong Medical College.
Kum ban shu pynkynmaw, mynshem snem ha u bnai Nailur, ka Education Cell jong ka KSU ka la thoh sha u myntri ba dei peit ia ka koit ka khiah ha kato ka por u Bah Prestone Tynsong ban pan jingshai halor ka jingsah teng ia ka jingtei ia ka Shillong Medical College kaba pynskhem ha u snem 2017 ha Reid Chest TB Hospital ha Mawprem.
Ka Cell ka la buh jingkylli ruh halor ka jingai shna ia ka kompeni KPC kaba la don dak sniew ha kiba bun ki jaka. Ia kane ka kolej la rah noh na Mawprem sha Umsawli namar ka jingrit palat ka jaka ha Mawprem ka bym iahap satia bad ki kyndon ka Medical Council of India.
Hangne ruh u James u la ong ba wat ka jaka ha Umsawli kaba don tang 17 akar ruh ka dang rit palat, ba u la ong ba un sa ia syllok bad kiwei ki myntri sorkar ba lada long yn rah noh sha kawei ka jaka kum ha Mawpdang ka ban hap hi hapoh New Shillong Township.
Na ka liang ka KSU halor kane ka mat ka ban jur biang ia u myntri ban ialeh katlah katiai ban pynurlong noh kham kloi ia ka jingtei ia katei ka kolej khnang ba kan long ka jingmyntoi kaba khraw ia ki samla pule ka jylla khamtam kito kiba wan na ki longiing ba kham duna bad ki bym lah ban phah pule shabar ka jylla. Kyntang ia wai ka seng kan iai bud dien ia kane ka mat tad haduh ba kan da urlong.
