Shillong, Jylliew 07: Ka cabinet kaba la long mynta ka sngi kala pdiang ka rai ban ai ia ka skhim Voluntary Retirement Scheme (VRS) jong ki nongtrei ka Mawmluh Cherra Cement Limited, na ki 455 ngut ki nongtrei ba don ha kane ka jaka pynmih dewbilat jong ka sorkar 145 ngut kila rai ban shong thait noh da kaba shim ia katei ka skhim.
U myntri rangbah u la ong ban siew ia kitei ki nongtrei kiba la rai ban shongthait da kaba shim ia tei ka skhim ka sorkar kan hap ban bei pisa T.22.3 klur tyngka , kane ka long shibynta jong ka T.80 klur ba ka sorkar kan iarap ha ka dur jong ka ram ia kane ka karkhana shna dewbilat jong ka sorkar, ka sorkar kala dep ban ai phra klur bad ia kaba sah kan sa dang ai.
Kane ka jingkwah jong ka sorkar ka long ban wad ki lad ki lynti kumno ban iarap ia kane ka karkhana shna dewbilat ba kan lah ban ieng ha la ki jong ki kjat, ka jingpynthymmei ia ka jingtrei kam jong ka MCCL kam dei tang katne hynrei kan long naduh ka rukom thung ia ki briew kiba ym da don kam ka ban ktah kai ia ka pla tyngka jong ka MCCL.
Kane ka jingiarap ia ka MCCL na ka liang jong ka sorkar ka shimhaduh u snem 2015 bad kajingkhein ka lah ban don ka jingiapher ha kaba ia dei bad ka jingkhein kaba la ai mynshuwa T.80 klur kalah ban kiew khyndait hangne hangtai.
Haba ia dei bad ka jingshna ia ki rule ha kaba ia dei bad ki kam tih marpohkhyndew ka sorkar ka dang buhteng namar ym pat biang, halor ka rule ban shim jaka da ka sorkar ia kane ka sorkar kan sa buh ha ki jingtip jong ki paidbah ba kin ai jingmut bad la ai por laiphew sngi lada don kiba kwah ban ai jingmut.
Ka sorkar kala shim ruh ia ka rai mynta ka sngi ba baroh ki jingiathoh shong kurim hap ban register bad ka sorkar bad kane kan trei kam noh katkum ka ain jong ka Compulsory Registration of Marriage Act.
