Shillong, Naitung 17:Ha ka sien banyngkong ka Ri-Bhoi Badminton Association (RBBA) ka la shim ia ka sien jam ban pynlong lympung ialehkai kaba la tip kum ka 32nd State Level Badminton Championship 2014 naduh ka 7 haduh 9 tarik u Naitung ha Indoor Stadium ka State Sport Council ha Umlyngkdait, Nongpoh, Ri Bhoi District.
U President ka RBBA, Bah Ferdynald K. Kharkamni u la ong ba kane ka dei ka sien kaba nyngkong eh ba la pynlong ia kane ka lympung ha Ri-bhoi bad kumjuh ruh ka seng ka la shim ruh ia ka lad ban pynpaw paidbah halor kane ka jingialehkai bad kumjuh ruh ban kyntiew ia ka sap ka phong jong ki khun samla.
Na ka liang ka synjuk ka la pynkhreh ban pynbiang ia ki jaka sah bad kumjuh ia ki jingdonkam na bynta ki nongwan iashim ha kane ka lympung kiba wan na kiwei ki district, khnang ba kan long kaba iaid beit iaid ryntih bad shitrhem.
Ha ka juh ka por, ula pyntip ruh ia ki nongshim bynta yn phiah ha ki lai kynhun kata ha ka kyrdan under 12/15/17/19 Boys/Girls (Singles & Doubles) bad Seniors Men/Womens (Single, Doubles & Mixed Doubles).
Na ka bynta ka jingtip ba kham bniah ki nongshim bynta ki lah ban phone ha kine ki number +91 8575041333 (President) bad+91 9856912528 (General Secretary) RBBA bad ki official ka MSBA.(SP News)
