Shillong, Iaiong 05: Mynta ka sngi u President ka Indian National Congress (INC) u Mallikarjun Kharge ha ka jingiadonlang ki kdhot ka All India Congress Committee (AICC) la pynlait paidbah ia ki kular elekshon na ka bynta kane ka Lok Sabha elekshon 2024 ba ka jingiathep vote ha ka bynta kaba nyngkong kan long ha ka 19/Iaiong/2024.
Ki mat kiba ka Congress party kala khlei paidbah ha kane ka elekshon MP sha Lok Sbha 2024 kiba la pruid dak ha jingkular ki long, ka jinglong kaba mar ia ryngkat, ban iada ka jinglaitluid ki niam bad ia ki rit paid.
Ban kyntiew ia ki samla, ka jingaibor shuh shuh ia ki kynthei, ki khun kynthei, na ka bynta ki nongrep bad ia ki kynhun ba im na ka kam tong dohkha bad kum juh na ka bynta kiba trei kam bylla.
Kala buh ha ka jingkular elekshon ban iada ia ka riti synshar jong ka Ri India, ban pynneh pynsah ia ka synshar paidbah, ban pynbha biang ia kaba la pynsniew, ki Latpathai khubor, ki iing bishar, ka jingialeh ia ki kam bamsap, ban pynneh pynsah ia ki riti dustur.
Kiwei kiwei ki bynta kiba la kdew ha ka kular elekshon ka long ban kyntiew ia ka ioh ka kot ka Ri, ka jingiaburom ia ka jingsynshar ha pdeng ka sorkar pdeng bad ki sorkar jylla, ban iada ia ka Ri bad ban iada ia ka mariang.
Ka kulae elekshon kaba la pynlait paidbah da ka seng Congress mynta ka sngi ka don haduh 54 sla bad ha kane ka kot la btai bniah ia ki mat treikam lada ka Congress ka wan ha ka bor ha kane ka elekshon sha ka iing dorbar parliamtent sha Lok Sabha.
