Shillong, Nailur 15: Ka jingialehkai kynjat bol kaba ar sngi lynter kala sdang mynta ka sngi ha Madan Polo, ia kaba la pynlong da ka SRVC Kerala Football Federation, Bethany Society ha kaba la kyrshan lang daka Shillong Football Association, ka tnad ialehkai jong ka sorkar jylla, ka ophis jong u Chief Electoral officer jong ka jylla.
Ha kane ka jingialehkai kala long kaba itynnad ha kaba ki team na baroh ar liang kim shym la lah ban ia thep kol ha ka jingialehkai kaba la buh ban long 50 minute, haba ym shym don ba ia thep la pynlong noh da ka jingiakynjat penalty ha kaba la shim mar hynriew ngut na kawei kawei ka kynhun.
Ha kane ruh ym shym la don ba lah ban thep bad na ka liang jong ki nongpyniaid kila shim ia ka rai ba baroh ar tylli ki kynhun ki long ki nongjop ha kane ka jingialehkai. Kane ka jingialehkai ka long ka sien kaba nyngkong kaba la pynlong na ka bynta jong kito kiba don ka jingduna ha ka bor iohi.
