Shillong, Jymmang 3: U Lat jong ka jylla u Ganga Prasad mynta ka sngi u la pynkub burom ia ki 17 ngut ki rangiakura kiba la wan ban ia shim bynta ha ki jingialeh ha kiwei ki ri jong ka pyrthei, ha ka jingialehkai kaba la tip kum ka “Jeet Kune Do bad Kickboxing” ia kiba la wanrah ruh ia ka nam ka burom ia ka jylla. Ia kane ka jingpynkup burom la pynlong ha Raj Bhavan Shillong.
Ha ka jingkren jong u Lat ka jylla ha kane ka jingpynkup burom ia kine ki nongialehkai, na ka liang jong u Lat u la ai khublei ia ki namar kila wanrah burom ia ka Ri, ia ka jylla baroh kawei ha ki jingialeh ki bapher bapher ha kylleng ki ri jong ka pyrthei. Na ka liang jong u Lat u la kyntu ia ki ba kin trei shitom ban pynlong ia ka Ri India kaba paw sha khmat ha ki jingialehkai katkum ka thong jong ka sorkar pdeng ia kaba la tip kum ka “Khelo India”.
U Lat jong ka jylla u la kyntu ia ki ba kin dang trei shitom shuh shuh namar ia ka National Games 2022 yn sa pynlong ha ka jylla bad u la ong ba kine kin dang hap ban trei shitom shuh ba ka jylla kan sa ioh ia u soh jong ka jingjop ha katei ka National Games.
Ha ka jingkren jongu KN Kumar principal secretary jong ka jylla Meghalaya u ba dei bad u Lat jong ka jylla, u la ai ka jingiaroh ia ki kmie ki kpa kiba la ai ka jingkyrshan ia ki khun jong kib a kin poi sha kane ka thong. Ia kane ka jingialang la pynlong da ka ophis jong ka Raj Bhavan ban burom ia ki nongialehkai bad kane ka long kum ka jingpynkhreh ia ka National Games 2022 ha kane ka jylla.
Kiba la shah pynkup burom mynta ka sngi ki ioh ia ka sertiphiket bad ia ka pisa kaba T.10,000 /- kiba la ioh ha ka takma ksiar, T.7500/- kiba la ioh ia ka takma rupa bad T.5000/- kiba la ioh ia ka takma rynnong. Ha kane ka jingpynkup burom ia ki ki rangialehkai kila pyni ruh ia ka sap ka phong kaba ki don.
Kiba la ia don lang ha kane ka sngi nalor jong u Principal Secretary jong u Lat ka jylla u KN Kumar, la don lang ka kong M War director ka tnad ialehkai, u Bah John F Kharshiing president jong ka Meghalaya State Olympic Association (MSOA) bad ki heh jong ka Meghalaya Jeet Kune Do bad Kickboxing Association lem bad ki kmie ki kpa jong ki ba shah pynkup burom.
