Shillong, Nohprah 18: Ka Khasi Students’ Union Saw Mer unit ha ka 15 tarik mynta u bnai ka la pyniaid ia ka 2nd Maitshaphrang Academic Awards cum Inter Unit Extempore Speech 2016 hapoh shnong Saw Mer, Upper Shillong ha ka por 2 baje nohphai sngi.
Ha kane ka lympung ba shongkun la pyniaid ia ka jingialang da u samla Daniel Kharbani, General Secretary KSU Saw Mer Unit ha kaba u samla Daniel Khyriem, President KSU CEC u la long u kongsan bad u samla Kitbok Dkhar, ex-Education Secretary KSU CEC u la long u symbud kongsan.
La sakhi lang ruh ia kane ka prokram da u Rangbah Shong Ka Saw Mer, u samla Bansharai Warjri Organising Secretary, KSU CEC, samla Lambok S. Marngar Finance Secretary, KSU CEC, samla Donald V Thabah Education Secretary, KSU CEC, samla Shemphang Lyngdoh Publicity Scretary, KSU CEC, samla Grace Lanong President KSU Girls’ Wing lem bad ki nongshong shnong ka Saw Mer.
Ha kane ka sngi ka KSU Saw Mer Unit ka la pynkup burom haduh 12 ngut ki samla pule kiba wan shakhmat ha ki jingpule kiba pher ba pher kum ka SSLC, CBSE, HSSLC, Bachelor’s Degree bad kumta ter ter. Ha kaba ia dei bad ka Extempore Speech pat ka KSU Saw Mer unit ka la pynlong ia ka jingiakhun hapdeng baroh ki units kiba hap hapoh ka KSU Upper Shillong Circle ha kaba ka KSU Umlyngka Unit ka la ioh rah ia ka nam lahduh.
