Shillong, Nailar 22: U bah Sanbor Shullai myntri ka sorkar jylla jong ka BJP ba dei MLA ba dei ruh u shongknor MCIC jong ka 19-South Shillong Konstitwensi u la ai da ka jingiarap da ka pisa ia ki nongtrei ka tnad ka koit ka khiah, ki ASHA, Aganwadi, kiba niah ia ki kali Ambulance ba kit ia kiba khlad kiba la trei shitom ha ka jingiakhun pyrshah ia kane ka khlam COVID-19.
U Bah Sanbor u la ai ia kane ka jingiarap sha baroh kitei ki nongtrei kiba dei napoh ka konstitwensi na ka tulop jong u kum u MLA, ka jinglut baroh ha kane ka jingiarap kala kot sha ka T.4,00,000 lak tyngka kane ka long kum ka jingburom ia kine ki nongtrei kiba la trei shitom ha kane ka jingia khun pyrshah ia ka khlam.
Haba kren ha kane ka jingialang ban ai jingiarap ia ki tei ki nongtrei, u bah Sanbor Shullai ba dei ruh u myntri ha kane ka sorkar MDA na ka party BJP la ong ba hapoh ka jingialam jong u myntri rangbah ka jylla u Cornad K Sangma ka dang ialeh ban weng ia ki jingeh na ka jingkyrduh pisa ha kane ka jingwan ar sien kane ka khlam COVID-19.
Ha ka jingialang u Bah Sanbor u la ong ba kum u nongmih khmat jong ki un dang ialeh ban iarap katba lah na ka bynta kine ki nongtrei kiba la trei shitom ban ia khun pyrshah ia kane ka khlam hapoh ka jylla Meghalaya, kane ka long kat kum ka kyrwoh kaba la bah da u Bah Anthony Marwein Secretary MCIC.
