Shillong, Iaiong 24: U Deputy Speaker jong ka jylla Meghalaya u Timothy D Shira mynta ka sngi u la plie ia ka jingialang kaba ar sngi jong ka “ National e-Vidhan Application” (NEVA) ha Annex Hall hapoh Assembly ha kaba la wan ban ia shim bynta da ki dkhot jong ka iing dorbar bad ki ophisar jong ka sorkar Meghalaya.
Haba plie ia kane ka jingialang, u Deputy Speaker jong ka jylla u la ong ba ka jingthmu jong kane ka jinialang ka long ban wanrah ia ka jingkylla ha ka jingtrei kam ha kaba ia ki jingtrei kam jong ka Assembly kan long kaba khlem da pyndon kam kot shuh. U la ong ba kane kan iarap ia ka jingtrei kam khlem don shuh kata ka jingong ban buhrieh.
Ha ka jingkren jong u Secretary jong ka ministry parliamentary affair jong ka sorkar pdeng u Surendra Nath Tripathi, u la ong ba ia kane ka NEVA, la bei pisa da ka sorkar pdeng ban shna ia kane ka “server” ha kaba baroh ar tylli ki iing dorbar jong ka Ri India ka Lok Sabha bad ka Rajya sabha kin don lang badkum juh na ka bynta ki sawphew tylli ki iing dorbar thawain jong ki jylla.
Lyngba kane ka e-Vidhan Application, ki nongmih khmat hapoh parliament, ha ki iing dorbar thawain jong ki jylla ki lah ban phah ia ki jingkylli jong ki bad ka sorkar ka lah ban jubab ia ki jingkylli lyngba kane ka ‘ e-Vidhan’ bad ha ka juh ka por ki paidbah kin tip aiu ki nongmih khmat jong ki ki kylli bad ka ei kaba ka sorkar ka jubab.
Ha kane ka ‘e-Vidhan kan kyntup ia baroh ki 5374 ngut ki nongmih khmat kaba ki paidbah ki la jied, ki paidbah mynta kin tip kaei kaba ki nongkhmat jong ki buh jingkylli hapoh ka iing dorbar ha ka por ba don ka jingiashong dorbar. La ong ba kane ka jingleh jong ka Ri India kan long ka nuksa ia ki ri jong ka pyrthei baroh kawei.
Ha ka jingkren jong u Dr Satya Prakash Joint Secretary jong ka ministry parliamentary affair jong ka sorkar pdeng, u la ong ba ka sorkar pdeng ka la pynlut haduh T.74 klur ban shna ia kane ka e-Vidhan bad na ka bynta kawei ka jylla ka jinglut ka long haduh T.12 klur, na ki sawphew tylli ki jylla haduh mynta naduh ba sdang ha u snem 2016 la lah ban pyndep 35 tylli ki jylla bad kum kine jingialang kane ka jinglang kaba mynta ka sngi ka dei kaba khatsaw.
Kaei kaba don kam hangne ka long ba ki sorkar jylla kin ai tang ia ki jingtip bad ia ka kam la leh da ka sorkar pdeng, la ong ba lyngba kane ki paidbah ki lah ban tip ia ki bill kiba ka sorkar kan wan rah hapoh ka iing dorbar bad kum juh ia ki jingkylli jong ki nongmih khmat paidbah ha ka Ri India baroh kawei.
Ha kane ka sngi na ka liang ki myntri sorkar kiba la wan ban ia shim bynta ki long u Bah AL Hek, u Bah Samlin Malangniang, ki MLA bad ki ophisar na ka sorkar jylla kyntup ia u PW Ingty Additional Chief Secretary jong ka sorkar jylla.
