Shillong, Iaiong 27: Ka sorkar Meghalaya mynta ka sngi u la pynmih ia ka hukum ba naduh la shai ka sngi ym shah shuh ban wanrah sniang na sha bar ka jylla na ka daw jong ka jingiap jong ki sniang sha Assam bad Arunachal Pradesh.
U Principal Secretary ka sorkar jylla ba dei peit ia ka tnad ri mrad u Dr Shakil P Ahammed mynta ka sngi u la pynmih ia ka hukum ba la khang ban wan rah sniang na sha bar ka jylla haduh ban da pynbna da kumwei pat.
Ka jingpynmih ia kane ka hukum ba ka long na ka daw jong ka jingiap khlem daw jong ka jingiap ki sniang ha Assam bad Arunachal Pradesh. Haba ia dei bad katei ka jingia na ka liang jong ka sorkar jylla kala bthah ia baroh ki jaka ring sniang jong ka sorkar bad kum juh jong ki riew shimet ba kin long kiba lah khuid.
Ki trai kim dei ban shah pathar ia ki briew ba kin rung ha ki jaka ri sniang bad ia ka jingbthah kaba bniah kala don ha ka website jong ka tnad ri mrad jong ka sorkar jylla http://megahvt.gov.in/
Na ka liang jong ka sorkar ka bthah ia ki briew ba kin bam ia doh sniang ha dien ba kila peit bha shuwa ban thied. Kiba ri sniang lada don ka jingiap kaba khlem daw jong ki sniang ki dei ban pyntip sha ki doktor jong ka tnad ri mrad jong ka sorkar jylla.
Na ka bynta ban ai jingtip lada ka don kano kano ka jingiap jong ki sniang ki briew ki lah ban phone sha kine ki number 9863316850/ 9436119910/ 8414953455.
