Shillong, Lber 16: Ki nongniah ar shaka ki ba juh kamai jakpoh da ka ba leit buh bad leit shawbriew ha poh ka shatri jong ka Ride to serve ki la pynlong da ka jingialang ha madan Malki ban ia kren halor ka hukum ba la pynmih da u commissioner of transports ba ki don kam ia ka permit ban kamai ha nongbah Shillong.
Ha ba ia kren bad ki ladpathai khubor na ka liang u bah A Nongkynrieh u ba dei u president u la ong ba ki la dep ban ai da ka jingthoh na ka por sha kapor sha ka sorkar bad tad haduh mynta kim pat ioh iakano kano ka jubab na ka sorkar bad kum ki dkhot ba don palat 300 ngut tam ki ba kamai ki kaw ban siew ia ka permit bad ki kyntait pat ban rung sha kano kano ka company.
U la ong ruh ba kim dei ki ba kamai Rapido bad ki dei ki ba kamai da ki thuk thuk jonglade da ka ba iaid offline, bad haduh mynta kam pat shym la don kano kano ka register bad ka dawhi ka dei namar ka jingbym shim khia jong ka Sorkar.
Kadaw ba ki la pynpaw ba kim kwah ban ia snoh bad kano kano ka company ka dei namar ba kim kwah ban siew bun jaka nalor ba ki la dep ban siew ia kabai permit ki hap ruh ban siew sha ki company.
U bah Nongkynrieh u la ong ruh ba ki la dep ban pynshai sha ka sorkar ha ka ba iadei bad ka kam kamai jongki bad ka shem jingeh ia ki ban kami khlem kano kano ka jingithuh bad kin sa leit ban ia kynduh biang ia u myntri ba dei khmih ia ka tnad Transport ban pynbeit noh ia kane ka kynrum kynram ki ba mih ha ka ba iadei bad ka jingkamai da ki arshaka.
