Jowai, Naitung 27: Ka AJYWO Central Governing Body ka la pynrem jur ia ki mynder ri bad ki barjylla ki ba don kti ha ka ban thombor ia ki pulit Pulit Enforcement jong ka KHADC bad ruh ia ki Nongthoh Khubor ha ka sngi 25 tarik mynta u bnai ha Iewduh katba ki Pulit Enforcement jong ka KHADC ki dang pynlong ia ka jingkhynra Trading License ha Iewduh ha katei ka sngi.
“Ngi pynrem jur haduh katta katta ia kane ka ka jingthom bor jong kine ki riew sniew ia ki Pulit Enforcement jong ka KHADC bad ruh ia ki nongthoh khubor ha ka jingkhynra Trading Licence jong ki pulit jong ka KHADC ha Iewduh ha ryngkat ka jingiadonlang ki Nongthoh Khubor. Kane ka jingthombor jong kine ki nongwei bad ki barjylla ia ki pulit jong ka KHADC bad ia ki Nongthoh Khubor ka dei ka jingthom bor ia ka jaidbynriew rit paid ha kaba ka jaidbynriew jong kam dei ban ailad da lei lei ruh em ha kaba kum kine ki jaidbriew kin ioh ban leh trai khlieh bad ruh thombor ia ka jaidbynriew,” ong u Bah M H Dkhar, President jong ka AJYWO Sengkmie.
U Bah Dkhar u la bynrap shuh shuh da ka ba ong, “Ki pulit jong ki KHADC kidei ki briew jong ka ain. Ki khlem leh ei ei hynrei ki shu pyndep la ka kamram na ka bynta ka jaidbynriew, katba ki Nongthoh khubor ba pli lei lei kim don bynta ei ei ruh em bad ka jingkhynra Trading License jong ki Pulit jong ka KHADC hynrei ki shu iadonlang ban pyndep la ka kamram ha kaba lum khubor. Kumno katei ka kynhun jong kitei ki nongwei bad barjylla ka nud ban thom bor ia ki, lada kim dei ka kynhun jong ki “Goonda” kaba mut ban thom da ka bor ia ka jaidbynriew jong ngi?. Ngin ym lah ban pdiang da lei lei ruh em ia kaba kum kane ka jingthombor pyrshah ia ka jaidbynriew jong ngi, kata ruh pyrshah ia ki briew jong ka ain bad ruh ia ki Nongthoh Khubor ba pli hynrei rei ym pyrshah ia ki para ‘Goonda’, katta ruh ha la ka jong ka ri”.
Ka AJYWO ka pynpaw ruh ia ka jingsngewnguh ia ki pulit jong ka East Khasi Hills District hapoh ka jingialam jong u bah M H Kharkrang halor ka jingkloi jong ki ban shimkhia ia kane ka jingshah thombor jong ki briew jong ngi da kaba kem wut wut ia ki nongialam jong katei ka kynhun kaba la thombor ia ki pulit ka KHADC bad ia ki Nonglum khubor. Ka seng ka kyntu ruh ia ki pulit jong ka East Khasi Hills ban thwet bad kem lut ia baroh kito kiba don kti ha kaban thombor ia ki pulit jong ka KHADC bad ruh ia ki nongthoh kot khubor bad ruh ban pynshitom ia ki da kaba tyngeh kat kum ka ain.
Ka AJYWO ka kyntu ruh ia ka KHADC ba kam dei ban kynran dien lyngba kane ka jingjia hynrei ka dei ban iaid shaphrang ban pyndep la ka kamram na ka bynta ka jingmyntoi jong ka Ri bad ka Jaidbynriew rit paid jong ngi. Ka seng ka kyntu ruh ia ka KHADC ba kam dei ban sngew shgain ha la de ban phah khynra Trading License tang da ki Pulit Enforcement jong ka ki bym don ia ki tiar iada, hynrei ka dei ban pan lang ia ka jingiasynranlang jong ki pulit ki ba biang tiar jingiada bad ruh ban khot iawer lang ia dkhot jong ki sengbhalang ban ia synran lem ia ki ha ka por ba ki leh ia ka Trading License Checking Drive khnang ban lait na kiba kum kine ki jingthombor bad ruh ban pyni ia ka jingiatylli jong ka jaidbynriew jong ngi.
“Ka jaidbynriew ka la dei ban kyndit bynriew noh mynta bad ban ieng tylli kawei ban ym ailad da lei lei ruh em ba u mynder shisngi un ioh long trai khlieh ha kane ka ri baieit jong ngi. Ngi dei ban sngewthuh kum ka jaidbynriew ba ki mynder kiba ngi la kdup la baroh shi katta ki long thik kum ki ’seinpuh kiba ngi la pynsyaid. Kan long ka jingma kaba khraw ia ka jaidbynriew jong ngi ynda haba kine ki ’seinpuh ba ngi la pynsyaid ding kin syaid, sngaid bad biang ka bor”, pynkut u kyrwoh naka AJYWO.(SP News)
