Jowai, Iaiong 28: Ha ka jingiakynduh ba kyrkieh jong ki nongialam jong ki san sengbhalang kiba kynthup ia ka SRS-EJH, AJYWO-CGB, KSU-JHDU, HNYF-EJZ bad ka FKJGP-KC mynta ka miet ha ka nongbah Khliehriat, ki la shim ia ka rai kyrkieh, ba na ki daw bym lah ban kiar, namar ba don ka jingiaseng General Assembly jong ka Presbyterian Church of India (PCI) ha ka balang Presbyterian Laitumkhrah, Shillong naduh ka 30 tarik mynta u bnai haduh ka 4 tarik u bnai ban wan, kumta, ki 5 seng, ki la weng noh shwa shipor ia ka pakhang shnong ba 48 kynta jong ki ha East Jaintia Hills District, kaba ki la pynbna ha East Jaintia Hills District.
“Ngim banse ban weng noh ia ka pakhang shnong ba 48 kynta kaba ngi la dep khot ban pynlong naduh ka 5 baje mynstep jong ka 30 tarik mynta u bnai haduh ka 5 baje mynstep jong ka 2 tarik u bnai ban mih ha East Jaintia Hills District namar ba kane ka pakhang shnong jong ngi ka la ia tyngkhuh bad ka Jingiaseng General Assembly jong ka Presbyterian Church of India ka ban long ha ka balang Presbyterian Laitumkhrah, Shillong namar shibun na ki nongleit nongwan jingiaseng jong ka PCI kin hap iaid lyngba jong ka NH 44.,” ong ki nongialam jong kitei ki 5 seng.
Kinongialam jong ki san seng ki kyrpad ruh ia u paidbah jong ka East Jaintia Hills District bad ruh jong ka ri India ba shatei lam-mihngi kiba shait ai ia ka jingkyrshan ia ki ba ba kim dei ban sngewthuh bakla lane sngewpher ia kane jingweng jyndat noh jong ki ia kane ka pakhang shnong ba la dep pynbna mynhynnin namar ki hap ban burom ia ki jinglehniam leh rukom jong baroh ki jaid niam ha ka ri India.
Ha kajuh ka por, ki nongialam jong ka SRS-EJH, AJYWO-CGB, KSU-JHDU, HNYF-EJZ bad ka FKJGP-KC ki la ong ba kin ym shong kli kti satia hynrei lada jia ba ka NHAI bad ka sorkar Meghalaya kam maramot noh mynta hi ia kane ka surok NH 44 naduh Soomer haduh Malidor, shen kin sa pynbna noh da ka jingiakhih kaba kham tyngeh shuh shuh ha baroh kawei jong ka East Jaintia Hills District ha kine ki khyndiat sngi ban wan.
Ki nongialam jong kitei ki san seng ki la ong ruh ba ki la pdiang ruh ia ka jingkhot ia kren jong u Deputy Commissioner jong ka East Jaintia Hills District, I Bah WR Lyngdoh ia ki lashai ka sngi ha ka por 2PM ha ka ophis trei kam jong u.(SP News)
