Nongpoh , Jylliew 18: Ka Nongpoh Block Congress Committee (NBCC) kum shi bynta ban ïoh ban bate kam ïa ki nongïalam bad ki nongkitkam ka la ïoh ban jied thymmai ïa ki dkhot kaba la pynskhem da u president ka MPCC, Dr. D.D Lapang. Ïa kine ki nongïalam bad ki nongkitkam bathymmai la jied ha ka 3 tarik jong u bnai Jylliew ha ka ophis treikam kaba don ha Nongpoh.
Ka Nongpoh Block Congress Committee ka la jied ïa u bah Mayral Bron Syiem kum u president, bah Plielad Tiewsoh kum working president, bah Opel Lyngdoh kum general secretary, bah Sency Lyngdoh kum senior vice president. Haryngkat kitei ki nongïalam la jied ruh ïa 13 ngut kum ki vice president, 15 ngut ki secretary bad 62 ngut ki executive member.
Ha katei ka sngi hashuwa ba kan don ka jingpynthymmai nongkitkam, ka ladon ruh ka jingpdiang burom ïa 20 ngut ki riew rangbah bad ki longkmie haoh ka jingïalam jong u bah Jop Tangsang, bah A. Mujoi bad kong R. Klein kiba la wan ban pyniasoh ia lade bad ka seng Congress.
