Shillong, Jymmang 13: Ki khynnah pule bad nonghikai jong ka Department of Music jong ka skulbah Martin Luther Chrsitian University (MLCU) ki la kiew ha rynsan jong ka Dorbar Hall, Mission Compound ban ia shim bynta ha ka jingkhawai jingrwai kaba la ai kyrteng “Ha Jylli ki Khriang.”
La ai kyrteng ia kane ka prokram kumne namar kane ka dei ka jingiakhleh lang ia bun tylli ki tnat jingrwai.Ka jingthmu ba kongsan ba la pynlong ia kane ka prokram ka long ban ai ia ki khynnah pule ia ka rynsan ha kaba ki lah ban pyni ia la ki sap ki phong bad ki jinghikai kiba ki la ioh.
“Kane ka prokram ka long shibynta na ka jingpule jong ki khynnah bad ka iarap ban pyshlur ia ki ban mih pyrthei ban pyni ia la ki sap ha ka liang ka put ka tem. Kane ka iarap ruh ban plie ia ka lad ioh ioh kam na ka bynta jong ki ha kaba ki lah ban iakynduh bad ki nongpyniaid ia ki studio jingrwai”, la ong u Dr. Mebanlamphrang Lyngdoh, HoD jong ka Department of Music.
Ki nongkhmih jong kane ka prokram ki long ka Tipriti Kharbangar na ka kynhun tem Soulmate, u Timmy Kharhujon na ka kynhun Snowhite bad u Ebenezer Sumer, u faculty ha ka Furtados School of Music, Mumbai uba long ruh u khynnah ba rim jong ka MLCU.
Uwei na ki nongkhmih u la ong, “Ka MLCU ka la pynmih ia ki sap ba kynsai jong ki samla. Ka long da shisha ka burom ban don bynta bad kane ka jingkhawai jingrwai. Ngi dei ban pynbuaid ialade da kine ki jingrwai bad ym da kiei kiei kiba sniew.”
Ki khynnah ki la tem ia ki jingrwai na ki tnat bapher bapher kum ka Indian, traditional, rock bad kumjuh ia ki jingrwai jong ki nongrwai ba pawnam kum ka Rihanna, James Brown, Reggae bad kiwei kiwei.
