Shillong, Nailur 23: U Bah JJ Lyngdkhoi u nongkhot ia ka jingialang jong ki ‘Train Teachers jong ka East Khasi Hills District’ u la ong ba ki ai por ia ka National Institute of Open Schooling (NOIS) shiphew sngi ba kan pynbeit ia ki jingbakla jong ka ha kaba pynmih ia ka result jong ki nonghikai kiba la ai jinghikai kiba la don ha ka kam.
Haba kren ha ki nongthoh khubor ha Shillong Press Club mynta ka sngi na ka liang jong u Bah Lyngdkhoi u la ong ba ki don bun ki jingbakla ha kaba ia dei bad ka result kaba la pynmih ha kine ki bnai kiba la dep da katei ka NOIS.
La ong ba na ka liang jong ki nonghikai baroh kiba la shah hikai ha kane ka NOIS, ba kinpyntbit ia lade ha ka kam hikai katkum ka jingkwah jong ka sorkar ka long b aka NOIS ka dei ban pynbeit ia kine ki jingbakla hapoh ka shiphew sngi, lem kumta kin pynlong ia ki jingiakhih.
Na ka liang jong kine ki nonghikai kila pynpaw ia ka jingsngew nguh ia ka sorkar jylla kaba la ai kane ka lad ia ki nonghikai ba kin ioh ia ki jinghikai ha kaba ia dei bad ka kam hikai skul na ka bynta ban pyntbit shuh shuh ha ki kam hikai.
Hynrei kaba sngewsih ka long ba nalor ba kala pynslem ban pynmih ia ka result haduh khyndai bnai naduh ba kila dep ban leh ia ka eksamin jong ki, ka pynmih pat sa ia ki result kiba bakla, kane ka long katkum kaba ki la print ia ki mark sheet na ka na ka internet. Ia ka Orginal mark sheet haduh mynta kim pat ioh.
