Shillong, Nailar 06: Ka FKJGP Sengkmie kam lah satia khlem da pyrto ia ka Executive Committee kaba mynta jong ka KHADC hapoh ka jingialam jong u Bah Ardent Miller Basaiawmoit kum u Chief Executive Member (CEM) bad kum ka seng ngin ai ka jing kyrkhu kyrdoh bad ka jing kyrshan kaba pura ia ka KHADC hi baroh kawei na ka bynta ka jing shimkhia halor ka Trading License. Wat lada ka ARPA hapoh ka jingialam jong u Bah Ardent Miller Basaiawmoit kum u Chief Executive Member (CEM) ka dang shimti tang ha ki khyndiat bnai ban ialam ia ka KHADC hynrei kum ka Jaitbynriew ngi la sakhi shisha ia ka jing ieng rangbah ban iada ia ka jing shah iuhroit bad ban pyntikna biang sa shisien ia ka jing long trai halor la ka jong ka khyndew ka shyiap. Ka seng ka pynrem jur ia ki riew shim kabu kiba dei ruh ki mynder ri kiba rieh tngen ha ka jainkyrshah bad ki bar jylla kiba la nud haduh ban ktah kti bad shoh pynmynsaw ia ki Enforcement jong ka KHADC ha ka por ba ki leit ban khynra ia ki dukan bar jylla bym don Trading Licence kat haduh ba la poi shaduh u pud ba ka jing pynibor ki bar jylla kim burom shuh wat ia ki Enforcement jong ka KHADC kiba don hapoh ka Uniform bad wat ia ki Lad Pathai khubor ruh kumjuh.
Ka FKJGP Sengkmie da ka mynsiem kitkhlieh iala ka jong ka Jaitbynriew kam lah satia khlem da ai mynsiem ia ka jing trei shitrhem jong ka KHADC kaba la nang iai bteng wat haduh kane ka khyllip mat kaba mynta ban khynra ia ki dukan bar jylla ki bym don satia ia ki Trading Licence, wat hapdeng ki dieng pyngkiang kiba pyrshang ban khanglad lyngba ka jing shah thombor ha ki poi-ei ha kine ki kyndiat sngi bala dep phewse ngi iohi shisha ia ka mynsiem ba shynrang bad kum ka jaitbynriew ngi sngew shngain bad sngew skhem hapoh ka jing ialam jong u Bah Ardent kum u nongialam. Ka seng kam lah khlem da ia khublei kyrpang ruh ia u Bah Latiplang Kharkongngor E.M. I/c Trade jong ka KHADC uba la trei shitom khlem shongthait ban bud dien halor katei ka kam khnang ba kum ka jaitbynriew ngin ioh biang sa shisien ban bat ia u Lakam jong ka Khaii ka Pateng uba la shah knieh kynthed ha ki bar jylla.
Ha kajuh ka por ka Seng ka Maham tyngeh ia kita ki Longkmie Khasi kiba pyrshang ban “Biah Phongrai” ia ka Jaitbynriew da kaba iada ia ki mynder kiba khaii be-ain khlem ka Trading License tang namar u sbai rupa ba shi khyllip mat, haduh ba kila klet wat iala ka jong ka iktiar ba kum ki longkmie khasi ruh ki don la ka jong ka bynta ban noh la u jong u synniang u bynhei ban iada iala ka jong ka jaitbynriew.
Kum ka seng kaba don ia ka jing kitkhlieh kan ym shong kli kti satia hynrei kan iai bud dien bad ka seng kan sa shim da ki sien jam kiba kham tyngeh ban ai jing sneng pyrshah ia kito ki khwan myntoi shimet kiba pyrshang ban shim kabu ha ka kyrteng jong ka jaitbynriew ha kajuh ka por ka seng ka maham jur ruh ia ki bar jylla kiba pyrshang ban shim kabu ia ki kynthei khasi ban pynlong iaki kum ka “Dulir Kha-ii ba im”.(SP News)
