Pynursla, Jylliew 12: Ka Eastern Pirates kaba na Pohkseh kala pynrem ia ka PHE Pynursla da lai kol la ka wei ha ka jingiakynjat phainalty ha dien ba ym shym don ba thep ha ka jingialehkai kaba la long ha madan Unkor-Urksew Pynursla, ha kaba da ki phew hajar ki paidbah kila wan ban skhi ha kane ka sngi ia kane ka jingialehkai.
Kane ka Tournament ka dei kaba sien kaba nyngkong kaba la khot ban pynlong da ka Umkor-Urksew Pynursla Football Club naduh ba la seng ia ka ha u snem 1968. Ka jingialehkai ha kane ka sngi kala long shishsa kaba itynnad ha kaba ki rangialehkai na baroh arliang kila iakhun tyngeh ban ioh thep ia ka kol.
Ha dien ba la dep ia ka jingialehkai kaba 90 minit kine ki ar tylli ki team kim shym la ioh ban thep kol, na ka liang jong ki nongpyniaid jong ka club kila pynlong da ka jingialehkai kaba laiphew minit ia kaba la khot ka extra time hynrei ym shym don ba thep ha dien kane la rai ban pynlong noh da ka jingiashut penalty ban ioh ia ka tip kaba jop.
Ha kane ka jingiashut penalty ka PHE na ki saw boll ba la shut kala ioh ban thep tang kawei katba ka Eastern Pirates na ki saw bol kiba kala shut kala ioh ban thep lai kol bad rah ia ka nam lahduh ha kaba kala ioh ia ka khusnam kaba shilak laiphew hajar tyngka,ha kaba la ai da u MLA kane ka jaka u Bah Prestone Tynsong bad ia ka Trophy sha ki nongjop la ai da u Dr Mukul Sangma myntri rangbah ka jylla.
katba ia ka team kaba wan baa r lai ai phraphew hajar tyngka, ha ka pisa la ai da u Bah Hopeful Bamon MLA, kiwei ki MLA kiba la ia don lang ha kane ka sngi ki long u Bah Sngewbhalang Dhar, Dr Celestine Lyngdoh bad ki MDC, ha kane ka sngi la pynkup burom ruh ia u Aiborlang Khangjee da u myntri rangbah ka jylla u Dr Mukul kum ka dak ba une u rang ialehkai ka ri India u dei na kane ka thain.
