Shillong, Naiwieng 13 : Ki nongialehkai Golf jong ka Assam ki la ioh ban tehlakam ia ka lympung ialehkai Golf jong ka 2nd North East Olympic Games 2022, kaba long ha madan Shillong Golf Course kaba la ju tip kylleng ka pyrthei da ka ‘Gleneagles of the East’, hadien ba ki la ioh ban khur haduh san tylli ki takma ksiar na katei ka lympung.
Katei ka jingialehkai ka la sdang naduh ka 10tarik u Naiwieng bad pynkut noh pat hynne ka sngi. Ki nongialehkai ki ioh ban ialehkai haduh 16 tylli ki thliew shisngi ha kine ki saw sngi ha katei ka jaka ialehkai kaba kham eh hynrei kaba itynnad pat.
Haba phai sha ka jingialehkai, nalor ki san tylli ki takma ksiar ka Assam ka la ioh ruh ban khur ar tylli ki takma rupa bad ar tylli ki takma rnong. Katba ka Meghalaya kaba dei ka trai jaka ka kylla long ka jylla kaba ar kaba lah ban ialehkai bha namar ka ioh ban khur kawei ka takma ksiar, hynriew tylli ki takma rupa bad saw tylli ki takma rnong.
Ka Manipur ruh ka la ioh ban khur lang kawei ka takma ksiar bad ar tylli ki takma rnong katba ka Arunachal Pradesh pat ka ioh tang kawei ka takma ksiar.
Ha katei ka lympung ka Assam ka la ioh ruh ban khur takma ksiar na ka jingialehkai kynhun lyngba ki nongialehkai kiba kynthup ia ka Snigdha Goswami, Jakir Hussain, Biki Datta bad Kalyan Sahul. Ka Meghalaya ka la ioh ban khur ia ka takma rupa ha kane ka thup bud sa ka Manipur ha ka takma rnong.
Lada phai pat sha ka thup kiba khur takma ksiar ha ki jingiakhun para marwei, ia ka khusnam Overall Individual Gold la ioh da u rangialehkai ba kynsai jong ka Assam u Goswami u ba la tam ia u Hussan jong ka Assam hi bad ia u Dr. KI Singh jong ka Meghalaya.
Ha ka thup iakhun para parwei, ka Meghalaya ka la ioh tang kawei ka takma ksiar bad kane ruh ka wan lyngba u heprit uba la jop ha ka Amateur division uba kylla long u nongialehkai golf ba khynnah tam jong ka jylla, u Jason Passah.
Utei u heprit u dang sdang ialehkai golf tang ha ki arsnem mynshwa hadien ba u la wanphai iing noh na ka daw ka khlam Covid-19. Ia ka kyrdan kaba ar ha katei ka thup la ioh da u Biki Datta jong ka Assam bad u Jonathan Iawphniaw jong ka Meghalaya.
Ka Goswami ka la ioh ruh ban khur ia ka takma ksiar ha ka jingiakhun jong ki kynthei bud sa ka Meghalaya ha ka takma rupa bad ka Jyoti Agarwal bad Pooja Goenka ha ka takma rnong.
U Keisham Indrajit Singh jong ka Manipur u la ioh ban khur ia ka nam lahduh ha ka Super Senior event da kaba tam ia u Bah Hector Marwein jong ka Meghalaya bad u Nagesh Singh jong ka Assam.
Ka takma ksiar ba tang kawei hi jong ka Arunachal Pradesh pat la ioh khur da u Col Hemonto Panging uba la jop ha ka thup Senior category da kaba tam ia u Benu Malakar jong ka Meghalaya bad Lhunkhotang Hangsing ka Manipur.
U Hussain u la khur ia ka takma rnong na bynta ka Assam ha ka Mid-Amateur category, katba ka Meghalaya ka la ioh khur ia ka takma rupa lyngba u Dr. Singh bad u Gaurav Bajaj.
Ha ka thup Professional category pat ia ka nam lahduh la ioh da u Deben Bhumij ka Assam, katba u Anil Ram ka Meghalaya ia ka kyrdan kaba ar katba u Deepraj Chetia ka Assam ia ka kyrdan kaba lai.
